Hræði­leg nýting Blika í hornum: „Eins og þetta sé ekkert æft“

Björn Sigurbjörnsson og Katrín Ásbjörnsdóttir ræddu um þennan veikleika Blikakvenna sem aðeins hafa skorað þrjú mörk úr 113 hornspyrnum á leiktíðinni, þrátt fyrir að hafa framúrskarandi spyrnumenn á borð við Öglu Maríu Albertsdóttur til að taka spyrnurnar.

„Ef þú ert svona lið sem er svona „dominant“ lið með boltann, eins og Breiðablik, sem fær fullt af hornum, þá verður þú að nýta fleiri horn.

Á móti liðum sem pakka í vörn á móti þér, svo boltinn endi frekar í horni en með skoti á markið, þá verður þú að nýta þér þetta,“ sagði Björn og benti á að Breiðablik væri nú meira að segja með Arsenal-manninn Gunnar Birgisson í þjálfarateyminu sem ætti að vera með nokkur trix frá sínu liði í ensku úrvalsdeildinni.

Að sama skapi hafa Blikar fengið á sig fjögur mörk úr hornspyrnum mótherjanna þó að þær séu mun færri.

„Þetta er lið sem að var eiginlega ekki hægt að skora á úr föstum leikatriðum fyrir ári síðan, og skoraði fullt. Auðvitað vantar Barbáru, sem var oft skotmarkið, en það eru þarna Elín Helena, Kristín Dís og Karitas og fleiri. Það er eflaust verið að vinna með þetta en þarna vantar attitjúd,“ sagði Björn.

Katrín var áður leikmaður Breiðabliks og býst við meira af sínu gamla liði:

„Það þarf að tímasetja hlaupin betur og fara yfir þetta á æfingum. Ég man að þegar Nik [Chamberlain] stýrði liðinu þá var farið rosalega vel yfir hornspyrnur, og margar týpur af hornspyrnum. Ég veit ekki hvernig þetta er núna en það er eins og þetta sé ekkert æft,“ sagði Katrín.