Báðar þyrlur og flug­vél gæslunnar á loft sam­tímis

Þetta staðfestir Ásgeir Erlendsson upplýsingafulltrúi Landhelgisgæslunnar í samtali við blaðamann Vísis. Hann greinir frá því að eitt útkallið hafi verið vegna einstaklings sem þurfti að sækja af skemmtiferðaskipi og flytja undir læknishendur.

Sóttur djúpt út á haf

„Flugdeildin er búin að sinna fjórum útköllum það sem af er degi og það er auðvitað nokkuð óvanalegt þó að það komi auðvitað fyrir í einhver skipti á hverju einasta ári að svo mörg útköll séu á einum og sama deginum,“ segir Ásgeir.

Fyrsta útkallið hafi borist í nótt þegar haft var samband við gæsluna frá skemmtiferðaskipi sem var statt við Jan Mayen, norska eyju í Norður-Íshafi.

„Þar var veikur farþegi um borð og skipstjórinn var þá beðinn um að sigla nær Íslandi, inn í dragi þyrlnanna og að þyrlurnar myndu fara af stað þegar skipið væri komið nógu nálægt landi,“ útskýrir Ásgeir og bætir við að svo hafi verið lagt af stað þangað norður.

Á sama tíma hafi gæslunni borist sjúkraútkall vegna veikinda í Flatey á Breiðafirði, þannig að hin vaktin hafi sinnt því útkalli. Áður en komið hafi verið að skemmtiferðaskipinu hafi enn eitt útkallið borist en það var vegna veikinda um borð í íslensku fiskiskipi. TF-GNÁ og TF-GRÓ hafi báðar verið á flugi samtímis vegna útkallanna.

„Þá var ákveðið að forgangsraða og byrja þar. Þannig að fyrst var byrjað á að sækja þennan veika skipverja í þessu fyrsta skipi sem var norður af landinu og hann var fluttur til Akureyrar,“ segir Ásgeir en þaðan hafi svo verið haldið í farþegaskipið og sjúklingurinn fluttur þaðan og á Akureyri.

Flugvélin send með þyrlunum

Stuttu seinna hafi fjórða útkallið borist en það var vegna veikinda á Patreksfirði. Tvö af fjórum útköllum hafi sem fyrr segir verið djúpt á sjó en þá sé áhöfnin á TF-SIF, eftirlitsflugvélinni, einnig kölluð út til þess að finna út hagstæðustu flugleið og aðstoða við samskipti og þvíumlíkt.

„Þannig að þetta er búið að vera ansi viðburðaríkur dagur hjá varðstjórum í stjórnsýslu Gæslunnar og hjá áhöfnunum sem hafa bara ekki stoppað,“ segir Ásgeir en síðustu daga hefur mikið mætt á þeim sömuleiðis.

„Þetta er kannski í takt við svona kannski síðustu daga, á fimmtudaginn voru tvö svona löng útköll, annað einmitt í skip, djúpt norður af landinu og síðan hitt á Grænlandi sem Gæslan sinnti eða þyrlusveitin.“

Hann segir öll útköllin hafa gengið mjög vel og það sé fyrir öllu. Það sé aukið álag sem fylgi því þegar útköll berist svona eitt ofan í annað og þá þurfi að forgangsraða.

„Þá þarf svolítið svona bara að meta það hvar þörfin er mest og forgangsraða þá eftir verkefnum,“ segir hann og bætir við „það eru margir sem koma að útköllunum sem þessum.“

Fréttin hefur verið uppfærð.