Dagbjartur eykur forystuna

Valur Páll Eiríksson skrifar 8. ágúst 2026 17:36

Dagbjartur er með afgerandi forystu fyrir lokahringinn og getur varið titilinn frá því í fyrra. Mynd/GSÍ

Dagbjartur Sigurbrandsson jók forystu sína fyrir lokadaginn á Íslandsmótinu í golfi sem fram fer á Korpúlfsstaðavelli í Reykjavík. Hann lék hring dagsins á tveimur undir pari og er með sex högga forystu.

Eftir bleytu fyrstu tvo dagana, sem sjá mátti þó enn á vellinum, blasti önnur áskorun við í dag en töluverður vindur setti svip sinn á þriðja hringinn.

Dagbjartur var með fimm högga forystu eftir fyrstu tvo hringi mótsins en hann var á átta undir pari fyrir þriðja hringinn í dag. Hann fékk skolla á annarri braut en í kjölfarið komu þrír fuglar og einn örn, sem fékkst á sjöundu brautinni.

Hann gaf aðeins eftir á seinni hluta hringsins, en síðasti fuglinn kom á elleftu braut vallar. Dagbjartur tapaði höggi og fékk skolla á bæði 15. og 16. braut og lauk hringnum á tveimur höggum undir pari, 69 höggum, eftir par á síðustu tveimur holunum.

Með spilamennsku dagsins jók Dagbjartur forystu sína á toppnum. Hann er á tíu undir pari og forystan fór úr fimm höggum í sex högg fyrir lokahringinn.

Aron Emil Gunnarsson úr Golfklúbbi Selfoss lék glimrandi vel í dag, fékk fjóra fugla og fór aðrar holur á pari, það skilaði honum upp í annað sætið á fjórum undir pari.

Í þriðja sæti er Hjalti Kristján Hjaltason úr GKG sem lék enn betur, á sex undir pari þökk sé fjórum fuglum og einum erni. Hann er á þremur undir pari í heildina.

Næstur kemur Tómas Eiríksson Hjaltested úr GR á tveimur undir pari en hann lék á einu höggi yfir pari í dag.

Markús Marelsson, Keili, Aron Snær Júlíusson, GKG, og Sigurður Bjarki Blumenstein, GR, eru jafnir í sjötta til áttunda sæti á tveimur yfir pari vallar.

Íslandsmótið í golfi