Fundu byssur í bílum og hand­tóku fimm

Andri Freyr Sveinsson varðstjóri á Akureyri staðfestir þetta í samtali við Vísi. Tveir bílar hafi verið stöðvaðir og skotvopn fundist í báðum bílum. 

Að öðru leyti verst lögregla allra fregna af málinu. Rúv greindi fyrst frá.

Á myndskeiði sem Vísir hefur undir höndum má sjá fjölda lögreglubíla við gatnamót í bænum. Þá sést í lögreglu leiða – að því er virðist – ungan dökkhærðan mann inn í lögreglubíl. Sá virðist klæddur í víðar buxur og strigaskó.

Mikill mannfjöldi hefur verið á Akureyri um verslunarmannahelgina þar sem fjölskylduhátíðin Ein með öllu hefur staðið yfir auk stórtónleika FM95BLÖ í gær.

Fréttin hefur verið uppfærð.