Aftur til Frakk­lands eftir sneypu­för til Chelsea

Rosenior var í dag kynntur sem nýr þjálfari Paris FC og tekur því við af Antoine Kombouare sem stýrði liðinu til 11. sætis í efstu deild Frakklands á síðustu leiktíð. Hann skrifaði undir samning sem gildir til tveggja ára, með möguleika á árs framlengingu.

Hinn 41 árs gamli Rosenior þekkir vel til í frönsku deildinni eftir að hafa stýrt Strasbourg með góðum árangri. Því liði stýrði hann til 7. sætis tímabilið 2024-25 og í Sambandsdeild Evrópu, með yngsta leikmannahópinn í fimm bestu deildum Evrópu.

Það gekk hins vegar ekki eins vel hjá Rosenior í Lundúnum en hann tók við Chelsea í janúar eftir að Enzo Maresca, sem nú er tekinn við Manchester City, hætti.

Rosenior var rekinn frá Chelsea í apríl en þá hafði liðið tapað fimm deildarleikjum í röð, án þess að skora eitt einasta mark.

Chelsea réði Xabi Alonso í sumar og þessi fyrrverandi stjóri Real Madrid og Leverkusen er því sjötti stjóri Chelsea á síðustu fjórum árum, að frátöldum bráðabirgðastjórum.