Bjargaði fugli úr tjörn í miðjum golfhring

Fugl virtist vera fastur í vír á miðju vatni á golfvellinum í Þorlákshöfn. Þar var Aldís Embla Magnúsdóttir að spila sinn fyrsta golfhring þegar hún tók eftir fuglinum í vatninu.

Þar sá hún að það var ekki allt með felldu og fór að synda í vatninu í öllum golffötunum til að reyna að bjarga fuglinum. Við tók langur eltingaleikur sem endaði með því að kylfingurinn náði fuglinum og virtist honum mikið létt.

Það eru ekki margir sem ná fugli á sínum fyrsta golfhring og líklegast enn færri á sama hátt og Aldís Embla.