Fengið morð­hótanir eftir við­skiptin við Caitlin Clark

Í leik liðanna í síðustu viku kýldi Thomas Clark í hálsinn en slapp við refsingu meðan á viðureigninni stóð. Eftir leikinn og mikla umræðu um hversu hart mótherjar Clarks fengju að ganga fram gegn henni var Thomas úrskurðuð í eins leiks bann.

Thomas er ósátt við bannið og gagnrýnir yfirmann WNBA, Cathy Engelbert, fyrir að verja leikmenn ekki nægilega vel fyrir netníði.

„Það er miður að þetta hafi komið upp í tengslum við körfubolta. Mörg okkar, þar á meðal ég, vissum ekki hvað hafði gerst fyrr en eftir leikinn,“ sagði Thomas.

„Við höfum fengið morðhótanir. Það er óafsakanlegt. Þetta þarf að breytast í deildinni og ég er búin að fá mig fullsadda af þessu.“

Thomas segir að það hafi aldrei verið ásetningur sinn að meiða Clark og finnst Engelbert ekki hafa tekið vel á eftirmálum atviksins.

„Fólk sendir okkur rasísk skilaboð og hatrið sem við höfum fengið vegna einhvers sem var algjört óviljaverk. Við höfum enn ekkert heyrt í Cathy. Það kemur ekkert á óvart. Þú getur séð það sem er á samfélagsmiðlum. Eins og venjulega segir hún ekki neitt,“ sagði Thomas.

Eftir leikinn í síðustu viku kvartaði þjálfari Fever, Stephanie White, yfir meðferðinni sem henni finnst Clark fá frá dómurunum í WNBA og sagði þá sýna henni vanvirðingu.

Thomas, sem varð Ólympíumeistari með Bandaríkjunum 2024, gekk í raðir Mercury í fyrra.

Mercury er í 12. sæti WNBA-deildarinnar af fimmtán liðum. Hin 34 ára Thomas er með 14,7 stig, 6,6 fráköst og 8,4 stoðsendingar að meðaltali í leik á þessu tímabili.