Sport

Elísa orð­laus eftir enn einn sigurinn á Ítalíu: „Vann ekki bara hlaupið“

Aron Guðmundsson skrifar
Elísa kemur hér í mark sem sigurvegari eftir frábæra frammistöðu í 80 kílómetra löngu utanvegahlaupi á Ítalíu og er vel tekið á móti henni.
Elísa kemur hér í mark sem sigurvegari eftir frábæra frammistöðu í 80 kílómetra löngu utanvegahlaupi á Ítalíu og er vel tekið á móti henni. Myndir: @lavaredoultratrail

Elísa Kristinsdóttir er orðlaus eftir enn einn sigurinn í sterku 80 kílómetra utanvegahlaupi á Ítalíu þar sem að hún þurfti að kljást við krefjandi aðstæður. 

Kíló­metrana átta­tíu í Lavar­edo-utan­vega­hlaupinu hljóp Elísa á 8 klukku­stundum og 59,57 sekúndum og náði þar með stóra mark­miði sínu í hlaupinu að klára á undir níu klukku­stundum. Hún var þrettán mínútum á undan Marie Goncalves í endamarkið en sú endaði í 2. sæti. 

Árangurinn ekkert annað en stór­kost­legur. Þetta er þriðji sigur Elísu á UTMB heims­mótaröðinni á síðustu átta mánuðum. Allir hafa sigrarnir komið í keppni á Ítalíu.

„Orð­laus yfir þessu hlaupi!“ skrifar Elísa í færslu á sam­félags­miðlinum Insta­gram eftir enn einn sigurinn á Ítalíu. „Skemmti mér svo vel frá byrjun til enda, stur­laðir stígar og klikkað um­hverfi.“

Hlaupið hefði ekki geta gengið betur að hennar sögn en það fór fram í fjall­lendi í grennd við Dólómítana. Átta­tíu kíló­metra vega­lengd með um 4500 hæða­metrum. Þá var hitinn mikill sökum hita­bylgju sem gengur yfir megin­land Evrópu þessi dægrin.

„Leið súper vel alveg í gegn. Ég vann ekki bara hlaupið heldur líka hæðina og hitann.“

Hlaup

Mest lesið


Fleiri fréttir

Sjá meira


×

Mest lesið