Missti móður sína og stýrir Frakk­landi ekki gegn Noregi

Deschamps mun snúa aftur til Frakklands til að vera viðstaddur útför móður sinnar. Fyrir vikið stýrir hann Frökkum ekki gegn Norðmönnum á HM á föstudaginn.

Guy Stéphan, sem hefur verið aðstoðarmaður Deschamps síðan hann tók við franska landsliðinu fyrir fjórtán árum, stýrir því í fjarveru hans.

Frakkland hefur unnið báða leiki sína á HM til þessa. Frakkar sigruðu Senegali, 3-1, og lögðu svo Íraka að velli í gær, 3-0.

Noregur er einnig með fullt hús stiga í I-riðli en liðin mætast á Gillette-leikvanginum í Foxborough á föstudaginn. Frökkum nægir jafntefli til að vinna riðilinn.

Deschamps hættir með franska liðið eftir heimsmeistaramótið. Undir hans stjórn varð Frakkland heimsmeistari 2018 og komst í úrslit á HM fyrir fjórum árum þar sem liðið tapaði fyrir Argentínu í vítaspyrnukeppni. Frakkar komust einnig í úrslit EM 2016 á heimavelli en lutu þar í lægra haldi fyrir Portúgölum, 1-0.