Bíll við bíl að Þing­völlum og um­ferð hreyfist hægt

Fréttastofa sló á þráðinn til að taka stöðu á umferðinni vegna tónlistarhátíðarinnar Bergmáls sem fram fer á Þingvöllum. Pétur segir umferð þó ganga þokkalega þrátt fyrir að margir bílar væru á ferðinni. Engin óhöpp hafi orðið í umferðinni þegar þessi frétt er skrifuð. Tuttugu þúsund manns munu bera hljómsveitina augum á Þingvöllum í kvöld. 

Hljómsveitin Kaleo spilar nú á sviðinu steinsnar frá Almannagjá. Hlusta má á tónleikana í beinni á Bylgjunni. Fréttamaður Sýnar er meðal þeirra sem nú eru í bílaröð. Bílaröðin hreyfist hægt og er umferðarteppa frá því fyrir Grafningsafleggjara. Þá er net og símasamband lítið í bílaröðinni samkvæmt fréttamanni.

Á annað þúsund starfsmanna vinna að tónleikunum og hefur búnaður og hljóðfæri verið fluttur í tonnatali á svæðið. Jakob Frímann skipuleggjandi hvatti í morgun fólk til að leggja af stað sem fyrst til að forða sér undan umferðarþunga. Hann minnti á að rútur fari frá Klettagörðum 27 á hálftíma fresti og lagði sú fyrsta af stað klukkan tíu í morgun.

„Og eru á hálftíma fresti út daginn. Svo er hægt að taka rútu aftur til baka ef menn eru orðnir saddir tóndaga,“ sagði Jakob Frímann við fréttastofu í morgun. 

Fréttastofa fékk ábendingu frá farþega um borð í rútu á leið til Þingvalla á þriðja tímanum. Sá sagðist sitja fastur í umferð. Góð loftkæling sé þó í rútunni og allir kátir. „Skömmu áður en maður kemur í Vinaskóg er algjör teppa alla leið að Þingvöllum,“ sagði farþeginn.