Höggið verði mikið fyrir ríkis­stjórnina segi þjóðin nei

Mikið hefur verið karpað um hvaða áhrif niðurstaða þjóðaratkvæðagreiðslunnar muni hafa á ríkisstjórnarsamstarfið. Sumir telja að ríkisstjórninni verði ekki stætt segi þjóðin nei á meðan aðrir telja að útkoman muni engin áhrif hafa. Eiríkur Bergmann, prófessor í stjórnmálafræði segir ljóst að niðurstaðan muni hafa mikil áhrif á ríkisstjórnarsamstarfið enda setji ríkisstjórnin sjálfa sig undir í atkvæðagreiðslunni.

„Höggið er ef þjóðin segir nei, það blasir algjörlega við. Ríkisstjórnin hefur ákveðið að ganga til aðildarviðræðna við Evrópusambandið. Þetta er ekki þannig að það sé eitthvað verið að athuga hvað þjóðinni finnst. Ríkisstjórnin vill ganga í Evrópusambandið að því gefnu að hún nái ásættanlegum samningi, það er hin pólitíska forysta sem er í málinu. Hún hefur beðið þjóðina að koma með sér í þá vegferð, veita henni umboð til þess. Og falli það þá kemur það sér mjög illa fyrir ríkisstjórnina. En samþykki þjóðin það, þá er það auðvitað sigur fyrir ríkisstjórnina.“

Málið sé keyrt áfram á vakt Samfylkingarinnar

Hann segir að höggið verði ekki minna fyrir Samfylkinguna en Viðreisn þó að síðarnefndi flokkurinn keyri málið áfram. Vilji ríkisstjórnin að málið farið í gegn verði forsætisráðherra að beita sér af fullum þunga í málinu.

„Sem forsætisráðherra hefur ekki gert enn. Ég myndi halda samt, höggið er alveg jafn mikið fyrir Samfylkinguna líka jafnvel þó hún beiti sér ekki fyllilega í málinu vegna þess að þetta er á þeirra vakt, þetta er þeirra mál. Ríkisstjórnin er að sækja um aðild að Evrópusambandinu.“

Flokkur fólksins hefur ekki verið fylgjandi aðild en sett afstöðu sína til hliðar í málinu.

„Þannig ég sé ekki að Flokkur fólksins sé í neinum sérstökum vanda verði þetta samþykkt, það er að segja haldi þingmenn sig við þá línu sem þeir hafa verið að leggja.“