Sektaður um átta milljónir fyrir karl­rembu

Adolfo Daniel Vallejo var sektaður um 65 þúsund Bandaríkjadali eftir að hafa sagt að kona hefði ekki átt að dæma leik hans í annarri umferð. Skipuleggjendur franska meistaramótsins tilkynntu þetta.

Vallejo tapaði fyrir franska táningnum Moise Kouame í síðustu viku eftir spennandi fimm setta viðureign sem stóð í tæpar fimm klukkustundir. Hann sagði síðar við tennisvefsíðuna Clay að „svona leik þurfi karlmaður að dæma“.

Mjög erfitt fyrir konu

Eftir tap sitt bætti Vallejo við: „Það er mjög erfitt fyrir konu að gera það.“

Keppendur sem komast í aðra umferð á Opna franska fá 130 þúsund evrur í verðlaunafé eða 18,8 milljónir íslenskra króna. Amelie Mauresmo, mótstjóri Roland Garros, sagði fréttamönnum á Opna franska að leikmaðurinn hefði verið sektaður um 65.000 evrur, „sem er um það bil helmingur af verðlaunafé hans“. Skipuleggjendur skýrðu síðar frá því að sektin væri í dollurum en ekki evrum.

Augljóslega óásættanlegt

„Þetta er augljóslega óásættanlegt. Enn og aftur eiga slík ummæli engan stað hér,“ sagði Mauresmo.

Vallejo, frá Paragvæ, sagði að dómarinn, Ana Carvalho frá Brasilíu, hefði ekki náð stjórn á áhorfendum.

„Það þarf karlmann til að dæma þetta, því þetta er mjög krefjandi áhorfendahópur og það þarf mikinn styrk til að fara gegn honum,“ sagði hann.

Frekar ákafur áhorfendahópur

„Áhorfendur voru mjög óviðeigandi en ég skil að þeir styðji samlanda sinn. Þetta er frekar ákafur áhorfendahópur og þess vegna var ég viðbúinn; ég vissi nú þegar að þetta yrði svona og, satt að segja, skaðaði það mig ekki, heldur styrkti það hann,“ sagði Vallejo.

Vallejo bætti við að Kouame hefði „tekið sér mikinn tíma í mörgum tilfellum, legið á gólfinu eða tafið leikinn.“

„Það er ekki eðlilegt að áhorfendur séu að hrópa í heila mínútu án þess að leikið sé. Í leik þar sem líkamlegi þátturinn skiptir svo miklu máli, ef þú gefur leikmanni mikinn tíma, mun hann augljóslega nýta sér það. Sannleikurinn er sá að það er líka erfitt fyrir dómara að stjórna þessum aðstæðum,“ sagði Vallejo.