Alcaraz ekki með á Wimbledon

Spánverjinn Carlos Alcaraz meiddist á Opna Barcelona-mótinu sem var haldið í apríl. Þar sigraði hann Finnann Otto Virtanen örugglega í fyrsta leik mótsins en fann fyrir verkjum og þurfti að draga sig úr keppni áður en hann gat hafið annan leik.

„Hvíldin gengur vel og mér er að batna, en ég er ekki ennþá tilbúinn að keppa,“ skrifaði Alcaraz í færslu á Instagram þar sem hann tilkynnir að hann keppir ekki á Wimbledon.

Nú er ljóst að Alcaraz missir af tveimur risamótum, Opna franska mótinu og Wimbledon, vegna þessara meiðsla sem er mikið áfall fyrir kappann.

Alcaraz sigraði Opna franska mótið síðustu tvö ár en ljóst er að hann muni ekki verja titilinn. Þetta er því gullið tækifæri fyrir aðalkeppinaut Alcaraz, Ítalann Jannik Sinner, til að vinna Opna franska mótið í fyrsta skipti.

Alcaraz hefur sigrað Wimbledon-mótið tvisvar en tapaði í úrslitaleiknum í fyrra á móti Sinner.