„Við þurfum að gera betur á öllum víg­stöðvum“

Valur sigldi til Vestmannaeyja frá Þorlákshöfn með Herjólfi í gærkvöld og mætir ÍBV í fjórða leik úrslitaeinvígis Olís deildar kvenna í handbolta í kvöld. Anton segir ferðalagið langa hafa lagst vel í hópinn.

„Fyrst fundur og æfing, svo rúta og bátur. Þetta gekk bara mjög vel,“ sagði Anton. Siglt hefur verið frá Landeyjahöfn nýlega en aðstæður leyfa það ekki þessa dagana og því var siglt frá Þorlákshöfn.

Valur hefði getað tryggt Íslandsmeistaratitilinn með sigri í síðasta leik.Karlalið Vals varð Íslandsmeistari tveimur dögum áður og búist var við því að kvennaliðið myndi klára einvígið með tilheyrandi hátíðarhöldum á Hlíðarenda.

Niðurstaðan varð hins vegar sannfærandi sjö marka tap. Hvernig ætla Valskonur að svara?

„Við höfum nýtt síðustu daga í að fara yfir okkar leik og það er klárt mál að við þurfum að gera betur á öllum vígstöðvum. Mér fannst við ólíkar sjálfum okkur varnarlega og við náðum ekki upp okkar besta leik. Í svona úrslitakeppni verðurðu að vera hundrað prósent í öllum þáttum leiksins til að vinna en það vantaði klárlega upp á varnarleikinn.“

Sókn ÍBV, með Söndru Erlingsdóttur fremsta í flokki, virtist óstöðvandi í síðasta leik og Valskonur áttu sannarlega ekki svörin. Hvernig ætlar Valur að loka betur á ÍBV í kvöld?

„Það er bara gamla góða klisjan, við þurfum að þétta raðirnar betur. Við höfum farið yfir okkar leik og höfum verið að spila hörku varnarleik í allan vetur, þetta var ólíkt okkur í síðasta leik. Við vorum of slitnar og þurfum að þétta.“

Í síðasta leik liðanna í Vestmannaeyjum varð Hafdís Renötudóttir, markmaður Vals, fyrir fordómum vegna kynhneigðar hennar. Stuðningsmaðurinn sem beindi köllum sínum að Hafdísi hefur verið dæmdur í bann frá leikjum og ÍBV fékk sekt vegna málsins.

„Ég ætla ekki að tjá mig um það. Ég ætla bara að ræða leikinn og einbeita mér að því. Við erum með fókusinn á leiknum og við þurfum að spila betur. Það er mikil tilhlökkun í hópnum að spila í kvöld,“ sagði Anton.