„Hefði haldið að það væri stefna HSÍ að vernda unga leik­menn“

Amalie Fröland, markvörður ÍBV, sleit krossband í oddaleik Eyjakvenna við Hauka á dögunum og ljóst að hún missir af úrslitaeinvíginu. Hún er ein aðeins tveggja markvarðar í aðalliðshópi ÍBV og um mikið áfall að ræða.

„Það er stórt skarð að fylla að missa Amalie út úr þessu. Aðallega er það áfall fyrir hana að detta út svona á lokasprettinum. Það er leiðinlegt. En það bíður þá stærra hlutverk fyrir Ólöfu sem hefur verið backup fyrir hana í vetur. Hún er búin að sýna okkur að hún er starfinu vaxin og tæklar þetta eins og meistari,“ segir Magnús og vísar þar til Ólafar Maren Bjarnadóttur.

Hefði haldið að HSÍ vildi vernda börn

Næsti markvörður inn hjá Eyjakonum er aðeins 14 ára gömul og eðli málsins samkvæmt hugðist þjálfarateymið ekki stilla barni upp á þessu stóra sviði sem blasir við. ÍBV sótti því um undanþágu til neyðarláns til HSÍ. Félagið vildi fá Eyjakonuna Andreu Gunnlaugsdóttur, markvörð Gróttu, á skammtímalán yfir úrslitaeinvígið.

„Við sendum þarna beiðni um neyðarlán, að fá markmann á láni, tiltekinn markmann sem spilar í Grillinu í dag og er leikmaður sem er uppalin hjá okkur í ÍBV. Við gerum það að þá forsendum að okkur þyki ekki forsvaranlegt að setja 14 ára leikmann í þær aðstæður að spila við fullorðnar konur,“ segir Magnús.

„Okkur fannst alveg borðleggjandi að þetta myndi fara hratt og örugglega í gegn. Fyrirfram hefði ég haldið að það væri einhver stefna hjá HSÍ eða ÍSÍ að vernda börn og ekki setja þau í aðstæður sem þeir ráða ekki við. Þess vegna kom okkur í opna skjöldu að svarið hafi verið nei, sem var illa rökstutt svar og óskiljanlegt með öllu,“

„Úr því að við erum að gæta hagsmuna ungs leikmanns þykir okkur þetta döpur niðurstaða,“ segir Magnús.

Myndi frekar setja sjálfan mig í markið

Blessunarlega hafi Eyjafólk haft upp á markverði í eynni, sem hefur þó ekki leikið handbolta lengi.

Hvernig leysið þið þetta fyrir leikinn við Val í dag? Eruð þið með einn markvörð á skýrslu eða er sú 14 ára með í för?

„Það kemur bara alls ekki til greina undir neinum kringumstæðum að hún sé í hóp. Ég myndi frekar setja sjálfan mig í markið en að setja eitthvað barn inn á völlinn. Við leysum þetta í dag þannig að það er með okkur stelpa sem var að spila með okkur í yngri flokkum og hún mun verma þetta sæti í leiknum í dag að minnsta kosti,“ segir Magnús og vísar þar til Töru Sólar Úranusdóttur sem hefur ekki spilað handbolta um nokkurra missera skeið, en mætir nú til leiks í einvígi um Íslandsmeistaratitilinn.

„Við erum virkilega þakklátir að hún sé til í þetta og tilbúin að stökkva inn og hlaupa undir baggann.“

ÍBV á móti Val og HSÍ

Nýta menn þetta ekki bara sem bensín og að þjappa hópnum saman fyrir komandi verkefni?

„Að sjálfsögðu var það þannig þegar þessi niðurstaða var kunngjörð, þá er þetta bara orðið ÍBV á móti Val og HSÍ í huganum á stelpunum sem finnst þetta mótlæti, og öllum öðrum finnst þetta bara mjög skrýtið,“

„Ég hef fengið símtöl frá vel flestum þjálfurum í deildinni sem, áður en þessi niðurstaða kom fram, buðu mér fram sína markmenn sem væru til í að koma og hjálpa okkur og vera á bekknum. Úr því að þetta væri landslagið hjá okkur,“

„Þannig að þetta er bara mótlæti sem við nýtum. Annars verður bara HSÍ að svara fyrir það hvers vegna þeir séu að bjóða upp á það að 14 ára leikmaður stigi fæti inn á völlinn,“ segir Magnús.

Leikur eitt í úrslitaeinvígi Vals og ÍBV er klukkan 15:00 í dag og verður lýst beint hér á Vísi.