„Í kvöld varð ég að stíga að­eins upp“

„Við vissum að þetta yrði erfitt“ sagði Amandine Toi eftir sigurinn í kvöld.

Haukar spiluðu án Krystal Freeman í kvöld og gerði það sigurinn enn sætari fyrir vikið.

„Við vissum ekki hvort hún yrði með okkur alla vikuna svo þetta snérist bara um að koma með þetta baráttu hugarfar og þjappa okkur saman og spila saman eins og ein heild án hennar“

„Þegar hún er ekki með þá erum við með færri fráköst og færri tækifæri inn í teig og Catherine Masa steig upp í hennar fjarveru“

Amandine Toi skoraði 34 stig í kvöld og fannst henni vera ákveðin ábyrgð á sér í kvöld með Krystal Freeman fjarverandi.

„Já auðvitað, hún er búin að vera hjálpa mér allt tímabilið á meðan allir voru kannski meira að einbeita sér að mér og í kvöld varð ég að stíga aðeins upp en það stigu allar upp í liðinu og þær hjálpuðu mér mikið“

Varnarleikur Hauka í kvöld var frábær og Keflavík var með 20 tapaða bolta.

„Við vitum að okkar styrkleiki er pressan okkar. Þær eru mjög gott lið og mjög gott skyndisóknarlið svo við vissum að ef við myndum halda stöðugleika og hægja á Keishana [Washington] þá yrði auðveldara fyrir okkur að vinna þennan leik“

Það fer mikil orka í varnarleikinn sem Emil Barja vill láta lið sitt spila.

„Það er erfitt og tekur mikla orku en eins og þið sjáið þá erum við að rúlla liðinu vel og á mörgum leikmönnum svo við fáum að hvílast og halda mómentum. Alltaf þegar þú kemur inn fersk þá getur þú sett meiri pressu svo það er klárlega styrkleiki“

Haukar fengu tólf daga hvíld frá síðasta leik en það var ekki að sjá neitt ryð á liði Hauka í kvöld.

„Þetta var ekki svo slæmt. Við höfum verið að æfa virkilega vel og æft stíft alla daga svo okkur leið ekkert endilega eins og við höfum fengið tólf daga hvíld og þess vegna vorum við í formi“

„Við vissum líka að þær fóru í gegnum fimm leikja seríu og við vildum pressa þær frá byrjun því við vissum að þær væru líklega þreyttari en við erum“ sagði Amandine Toi.