Endur­skoða gjaldsvæði borgarinnar

Tillögurnar sem voru samþykktar voru að endurskoða gjald á gjaldsvæði P1 og verður hluta P2-svæða breytt í P3. Munurinn er að á P3-svæðinu er ekki gjaldskylda um kvöld og helgar. Þá á að endurskoða útfærslu á gjaldskyldu á sunnudögum.

Borgarstjórn samþykkti einnig að endurskoða gjaldskyldu á íbúasvæðum með það að markmiði að gera íbúakort sveigjanlegri og einfalda umsóknarferlið. Að lokum verður ráðist í markvissa kynningu á bílastæðahúsum Reykjavíkurborgar og aðgengi að þeim.

Þegar vinnunni við breytingarnar á gjaldskrá og gjaldskyldu er lokið verða þær sendar í samráðsgátt.

„Sérstaklega skal gera íbúum og hagsmunaaðilum viðvart á þeim svæðum sem breytingarnar hafa áhrif á,“ segir í fréttatilkynningu frá borginni.

Sjálfstæðisflokkurinn lagði fram upprunalegu tillöguna en í henni fólst til að mynda að gjaldskylda á gjaldsvæðum P1 og P2 yrði felld niður eftir klukkan 18 virka daga auk gjaldskyldu á sunnudögum. Hinsvegar hlaut tillagan ekki náð meirihlutans og var að endingu breytingartillaga meirihlutans samþykkt. Tillaga meirihlutans er líkt og er lýst er hér fyrir ofan.

Það sem var til dæmis í báðum tillögunum var að endurskoða gjald á gjaldsvæði P1 og að tillögurnar myndu fara í samráð íbúa og hagsmunaaðila. Einnig sammæltust þau um að ráðast í markvissa kynningu á bílastæðahúsum borgarinnar og bæta íbúakortin.

Fréttin hefur verið uppfærð.