Magnaður McIlroy með stærsta for­skot sögunnar

McIlroy fór fljúgandi af stað og byrjaði hringinn á þremur fuglum áður en skollar á 5. og 10. holu tóku við.

Endaspretturinn hjá McIlroy var síðan enn betri en byrjunin. Á síðustu sjö holunum náði hann sex fuglum. Þannig lauk hann hringnum í dag á 65 höggum, eftir að hafa farið fyrsta hringinn á 67 höggum í gær.

Besta höggið hjá þessum magnaða kylfingi var vafalaust á 17. holu þegar hann vippaði boltanum beint ofan í holu af 25 metra færi.

Ef McIlroy heldur áfram að spila svona vel verður hann sá fyrsti síðan Tiger Woods árið 2002 til að verja Masters-meistaratitilinn. 

Norður-Írinn er langefstur nú þegar mótið er hálfnað en Sam Burns og Patrick Reed deila öðru sætinu, sex höggum undir pari eftir fyrstu tvo hringina.

Enginn hefur áður verið með jafn stórt forskot eftir fyrstu tvo dagana. McIlroy er með sex högga forskot á næstu menn en fyrra metið var fimm högga forskot.

Nokkrir hafa náð því áður en sá síðasti var Scottie Scheffler, efsti kylfingur heimslistans, þegar hann vann mótið árið 2022.

Scheffler var meðal efstu manna eftir hringinn í gær en stóð sig ekki jafn vel í dag. Hann lauk leik í dag tveimur höggum yfir pari og er dottinn niður í 24. sæti.