Virkjuðu viðbragðs­áætlun vegna flug­slyss

Flest verkefnin í dag hafa verið á Suðurlandi og suðvesturhorninu og voru björgunarsveitir meðal annars kallaðar út á Hellu og Hvolsvelli til að bregðast við foktjóni víða á svæðinu þar sem þakplötur og klæðning fuku af húsum. Þetta kemur fram í tilkynningu frá Slysavarnafélaginu Landsbjörg. 

Ekkert sérstakt atvik kallaði á viðveru björgunarsveitarmanna í Grindavík í kvöld en það var talið öruggara í ljósi stöðunnar, að sögn Jóns Þórs Víglundssonar, upplýsingafulltrúa Landsbjargar.

Vélarbilun í einkaþotu

Á Norðurlandi aðstoðuðu björgunarsveitarmenn að minnsta kosti 7 bíla sem sátu fastir við Biskupsháls, um 50 kílómetra austur við Mývatn.

Allar björgunarsveitir í Eyjafirði voru ræstar út þegar einkaþota í flugtaki varð fyrir vélarbilun og sneri við til öryggislendingar á Akureyrarflugvelli. Vélin lenti heilu og höldnu rétt um klukkan 16:20, að því er fram kemur í tilkynningu. Allar björgunarsveitir hafi verið boðaðar í samræmi við viðbragðsáætlun vegna flugslyss.

Í Borgarfirði var Björgunarsveitin Ok kölluð út til að sinna sjúkraflutningi vegna slæmrar færðar og veðurs. Þá voru björgunarsveitir á Tálknafirði og Bíldudal boðaðar út vegna nokkurra bíla sem sátu fastir á Hálfdán. Voru um 10 manns flutt niður af fjallveginum annars vegar á Tálknafjörð og hins vegar á Bíldudal, að sögn Landsbjargar.

Föst við Þingvelli

„Á Þingvöllum voru þó nokkuð margir sem komust ekki leiðar sinnar. Björgunarsveitir losuðu milli 10 og 15 bíla við Miðfell, austanvert við Þingvallavatn ásamt því að aðstoða nokkurn fjölda manns sem voru við þjónustumiðstöðina í þjóðgarðinum. Þjónustumiðstöðin var lokuð og fylgdu björgunarsveitir fólkinu til byggða. Einhverjir bílar, t.d. húsbílar voru skildir eftir þar,“ segir í tilkynningunni.

Fjölmargir hafi lent í vandræðum í Þrengslum og á Hellisheiði og snjóbíll verið notaður til að losa bíla og koma fólki niður úr Þrengslunum. Þá fylgdu björgunarsveitir fólki til byggða.

Í Kjósinni lentu nokkrir ferðalangar á Kjósarskarðsvegi í vandræðum fyrr í dag og fóru björgunarsveitir úr Reykjavík og af Kjalarnesi þeim til aðstoðar, að sögn Landsbjargar. Björgunarsveitarmenn hafa víða sinnt vegalokunum í dag, þar á meðal á Suðurnesjum.

Fylgjast má með nýjustu vendingum í dag í óveðursvaktinni á Vísi.