Yfir­gaf Sjálf­stæðis­flokkinn og leiðir Mið­flokkinn í Borgar­byggð

Héraðsfréttablaðið Skessuhorn greindi fyrst frá því að Haukur Þór myndi leiða lista Miðflokksins í komandi sveitarstjórnarkosningum í Borgarbyggð. Framboðslistinn verður þó ekki opinberlega kynntur fyrr en eftir páska.

Haukur var á yngri árum virkur í flokksstarfi Sjálfstæðisflokksins og gegndi þar ýmsum trúnaðarstörfum, var meðal annars varaformaður Heimdallar, í stjórn hverfafélags og landsfundarfulltrúi. Hann er eiginmaður Ástu Möller en hún sat á Alþingi fyrir Sjálfstæðisflokkinn á árabilinu 1999 til 2009.

Haukur hefur einnig verið í framvarðarsveit í samtökum kaupmanna en hann var formaður Félags íslenskra stórkaupmanna og Samtaka verslunarinnar. Hann var kaupmaður í Borgarljósum þar til ljósafyrirtækið var selt árið 2002 en rekur núna fyrirtækjaráðgjöfina Investis.

Fyrir rúmum áratug fluttu þau hjónin heimili sitt úr Reykjavík og byggðu upp jörðina Fornastekk í Stafholtstungum. Þar hafa þau stundað margvíslegan frístundabúskap.

Í samtali við fréttastofu Sýnar kveðst Haukur hafa sagt sig úr Sjálfstæðisflokknum vegna óánægju með samstarf flokksins með Vinstri grænum í síðustu ríkisstjórn. Ríkisútgjöld hafi þá snaraukist og opinberum starfsmönnum fjölgað umtalsvert. Auk þess hafi sér mislíkað margt í utanríkisstefnu ráðherra flokksins.

Hann hafi þó ekki gengið í Miðflokkinn fyrr en nýlega eftir að leitað var til hans um að leiða framboð flokksins í Borgarbyggð. Hann hafi slegið til enda hafi sér hugnast vel málflutningur flokksins.

Haukur er þegar farinn að láta til sín taka í opinberri umræðu um málefni Borgarbyggðar. Hann segir að taka þurfi til í fjármálum sveitarfélagsins eftir skuggalega skuldaukningu. Þá kveðst hann ætla að beita sér af alefli gegn áformum um vindmyllur á hálsum Borgarfjarðar og lagningu háspennulínu í gegnum sveitirnar.