Sjáðu mörkin og sláar­skot í naumu tapi Ís­lands gegn Frakk­landi

Heilt yfir fín frammistaða í leik dagsins hjá íslenska landsliðinu sem lenti undir strax á tíundu mínútu þegar að Noe Leberton kom Frökkum yfir með fyrsta marki leiksins. 1-0.

Þannig stóðu leikar allt þar til á 24.mínútu er Daníel Tristan Guðjohnsen jafnaði metin fyrir Ísland með marki úr vítaspyrnu eftir að Frakkinn Leni Yoro, leikmaður Manchester United, hafði brotið á Daníel Frey Kristjánssyni innan vítateigs. 1-1. 

Leikurinn stóð þó ekki jafn lengi því aðeins fimm mínútum eftir jöfnunarmark Daníels Tristans kom Nathan Zeze Frökkum yfir á nýjan leik. 2-1.

Reyndust það lokatölur leiksins en minnstu mátti muna að Ísland næði að jafna leikinn en skot Loga Hrafns Róbertssonar endaði í þverslánni og fór þaðan yfir markið. 

Úrslitin gera það að verkum að Frakkar eru á toppi riðilsins með 16 stig en Ísland er í 2.sæti með 11 stig. Frakkar eiga þó leik til góða á okkar menn. Liðin mætast næst hér heima þann 25.september síðar á þessu ári.