„Hann er kominn aftur“

Martin hjálpaði liði sínu, þýska körfuboltaliðinu Alba Berlin, að vinna 21 stigs útisigur á Basketball Löwen Braunschweig í þýsku deildinni í dag, 94-73.

Eftir þennan sigur er Berlínarliðið í öðru sæti deildarinnar tveimur stigum á efrir toppliði Bayern.

Martin meiddist á þumalputta fyrir næstum því tveimur mánuðum síðan og missti af síðustu landsleikjum Íslands af þeim sökum.

Á miðlum Alba Berlin kemur fram að þumalfingur Martins hafi brugðist vel við fyrstu æfingunum.

Martin spilaði í fjórtán mínútur í leiknum og var með fimm stig, tvö fráköst og tvær stoðsendingar. Hann klikkaði á öllum þremur skotum sínum utan af velli og tapaði þremur boltum en setti niður fimm vítaskot af sex.

Þetta var fyrsti leikur hans í þýsku deildinni síðan 2. febrúar.

Jón Axel Guðmundsson var með tíu stig og fjórar stoðsendingar á tuttugu mínútum þegar San Pablo Burgos tapaði með fimm stigum á heimavelli á móti Valencia, 74-79. San Pablo Burgos situr í sextánda sæti en liðið er í harðri fallbaráttu í deildinni.