Inn­kalla kerti vegna eld­hættu

Í fréttatilkynningu þess efnis segir að vegna mistaka í framleiðslu geti sum Smöjträd kerti verið með auka búta af kveik í kertavaxinu. Í þeim vörum sem um ræðir geti kviknað í auka kveikunum, sem valdi þá stærri loga en eðlilegt er og við það skapist eld- og brunahætta.

„Viðskiptavinir okkar sem eiga umrædd kerti ættu að taka þau úr umferð og koma með þau í IKEA verslunina til að fá nýja vöru eða endurgreiðslu. Kvittun er ekki skilyrði fyrir endurgreiðslu. Að auki hvetur IKEA viðskiptavini til að láta orðið berast, sérstaklega ef vitað er til þess að vörurnar hafi verið gefnar, lánaðar eða seldar öðrum.“