Sonur Maradona: „Ef pabbi var Guð er McTominay Jesús“

McTominay hefur slegið í gegn hjá Napoli eftir að hann kom frá Manchester United fyrir síðasta tímabil. Hann var í lykilhlutverki þegar Napoli varð ítalskur meistari í fyrra og var valinn besti leikmaður ítölsku úrvalsdeildarinnar.

McTominay hefur haldið uppteknum hætti í vetur og á föstudaginn skoraði hann sigurmark Napoli gegn Cagliari.

Eftir leikinn mætti Diego Armando Maradona yngri, sonur Napoli-goðsins sjálfs, í útvarpsviðtal þar sem hann jós McTominay lofi.

„Ef pabbi var Guð er McTominay Jesús,“ sagði Maradona yngri án þess að blikna.

Napoli hefur unnið fjóra leiki í röð og er í 3. sæti ítölsku úrvalsdeildarinnar. Liðið getur skotist upp í 2. sætið með sigri á AC Milan í fyrsta leiknum eftir landsleikjahléið.

McTominay hefur skorað ellefu mörk í 36 leikjum með Napoli í öllum keppnum í vetur. Á síðasta tímabili skoraði hann þrettán mörk í 36 leikjum, þar af tólf í ítölsku úrvalsdeildinni.

McTominay og félagar hans í skoska landsliðinu mæta Japan og Fílabeinsströndinni í tveimur vináttulandsleikjum í lok þessa mánaðar.