Tæknivillan tekin til baka og Doncic sleppur við bann

Doncic fékk sína sextándu tæknivillu á tímabilinu fyrir orðaskipti við Goga Bitadze, framherja Orlando Magic. Þeir voru báðir aðvaraðir af dómaranum áður en flautan gall og þeir fengu tæknivillur.

Orðin voru látin falla á serbnesku og óvíst er hvað nákvæmlega var sagt en bandarískir miðlar segja þá hafa dregið fjölskyldur hvors annars inn í myndina.

Doncic svaraði fyrir sig eftir leik og sagðist bara hafa verið að verja heiður fjölskyldu sinnar en hann stendur þessa stundina í skilnaðardeilum.

Los Angeles Lakers ákváðu þá að áfrýja dómnum og eftir úrskurð aganefndar var tæknivillan sem var dæmd á Doncic tekin til baka.

Slóvenski framherjinn mun því ekki taka út leikbann þegar Los Angeles Lakers mæta Detroit Pistons í nótt.

„Augljóslega gert til að auka sjónvarpsáhorf“

Þó Lakers stuðningsmenn fagni þessari ákvörðun eru ekki allir á eitt sáttir með hana. NBA spjallþáttastjórnandinn Skip Bayless tjáði sig tæpitungulaust á Twitter og sagði þessa ákvörðun eingöngu tekna til að auka sjónvarpsáhorf á stórleikinn í kvöld.