Upp­gjör: Þór Þ.-Njarðvík 109 - 72: Þórsarar lifa í voninni eftir öflugan sigur

Þór Þorlákshöfn rúllaði í kvöld yfir Njarðvíkinga í fjörugum leik í Bónus-deild karla í körfubolta. Þórsarar voru fyrir leikinn að spóla í fallbaráttufeninu og þurftu á þessum sigri að halda til þess að eiga von um að halda sæti sínu í deildinni. Lokatölur 109-72.

Þórsarar hafa dansað við fallbaráttudrauginn í allan veturinn en eftir tap gegn Ármenningum í síðustu umferð varð dansinn enn torsóttari. Vegna innbyrðis viðureigna höfðu liðin sætaskipti og sátu Þórsarar því í fallsæti fyrir leikinn. Þeim dugir því ekki lengur að vinna sína leiki; þeir þurfa einnig að treysta á að lukkudísirnar verði þeim hliðhollar og að Ármann misstígi sig.

Njarðvíkingar hafa hins vegar verið á uppleið undanfarnar vikur og mættu til leiks í kvöld með tvo sigurleiki í farteskinu. Í síðustu umferð rúlluðu þeir yfir Valsara og sýndu þar sannfærandi gæði. Liðsheildin var sterk og áttu Veigar Páll Alexandersson, Sven Smajlagic, Dwayne Lautier-Ogunleye og Dominykas Milka allir frábæran leik. Þeir skoruðu hver um sig í kringum tuttugu stig og boltinn gekk lipurlega á milli leikmanna. Þórsura beið því krefjandi verkefni.

Fyrsti leikhluti fór vel af stað hjá Þórsurum. Þeir hentu sér á alla bolta og höfðu betur í slagsmálunum undir körfunni. Þeir lögðu mikið kapp á að loka á Dominykas Milka og voru með tvo menn í grímunni á honum strax í upphafi. Eins reyndu þeir að loka á skotin hjá Dwayne Lautier og það gekk upp. Lazar Lugic var grimmur hjá Þórsurum og setti niður snyrtilegar körfur. Þórsarar leiddu með níu stigum eftir fyrsta leikhlutann.

Annar leikhluti fór vel af stað. Njarðvíkingar þjöppuðu sér saman og Dwayne Lautier náði að slíta sig betur frá varnarmönnum Þórs og komast í góð skot. Heimamenn héldu þó áfram að bíta frá sér og Djordje Dzeletovic fór fyrir sóknarleik þeirra. Dachon Burke var ekki jafn skotglaður og fyrir viku og það hafði góð áhrif á aðra í sókninni. Lautier og Milka héldu áfram að bera af hjá Njarðvíkingum.

Staðan í hálfleik var 51-43, Þórsurum í vil. Djorde Dzeletovic var besti leikmaður fyrri hálfleiksins og var kominn með 15 stig þegar flautað var til hálfleiks.

Seinni hálfleikurinn fór fjörlega af stað. Njarðvíkingar sóttu í sig veðrið og komu beittari til leiks út úr hléinu. Dwayne Lautier hélt áfram að taka mikið pláss en Þórsarar voru með Milka á lás undir körfunni. Njarðvíkingar minnkuðu muninn í sjö stig við upphaf þriðja leikhluta og virtust ætla að vinna sig inn í leikinn. Þórsarar voru ekki sammála og settu í fluggírinn. Lazar Lugic og Djorde Dzeletovic voru hungraðir í sókninni og Burke hélt ró sinni í skotgleðinni.

Þórsarar leiddu með fimmtán stigum við upphaf síðasta leikhluta. Þeir voru þó hvergi hættir. Ákefðin hjá þeim var meiri og við það var eins og Njarðvíkingar yrðu litlir hræddir strákar. Skotin duttu niður hjá Þórsurum og vörnin hélt. Munurinn á milli liðanna jókst með hverri mínútunni og dropinn holaði steininn.

Þórsarar unnu leikinn 109-72 og eiga enn von á að halda sér uppi í deild þeirra bestu. Þeir verða þó að treysta á ÍA á móti Ármenningum og vinna Grindvíkinga í lokaumferð tímabilsins. Það er enn tölfræðilegur möguleiki en staðan er þó enn ansi strembin.

Atvik leiksins

Fjórði leikhlutinn var atvik leiksins. Allt gekk upp hjá Þórsurum og þeir léku eins og vel smurð vél. Keppnisskapurinn í Djorde smitaðist út frá sér til annarra leikmanna.

Stjörnur og skúrkar

Lazar Lugic og Djorde Dzeletovic voru stjörnur leiksins. Sá síðarnefndi setti niður 26 stig og var um tíma allt í öllu hjá Þórsurum. Lazar setti niður 24 stig.

Hjá Njarðvíkingum var skein Dwayne Lautier skærast.

Skúrkur kvöldsins var Luwane Pipkins. Hann sást ekki hjá Njarðvíkingum og var í feluleik allan leikinn.

Dómararnir

Dómarar í kvöld voru Kristinn Óskarsson, Bjarni Hlíðkvist Kristmarsson og Eggert Þór Aðalsteinsson. Tríóið fékk að heyra það úr stúkunni og frá varamannabekk Njarðvíkur. Spennan var mikil og tríóið réð ekki við flæðið á köflum.

Stemmning og umgjörð

Þorlákshafnarbúar blésu í herlúðra í síðustu umferð og buðu upp á ljósashow fyrir leik og smekkfulla stúku. Það skilaði ekki sigri inni á vellinum og því var sleppt slíku prjáli í kvöld. Stúkan var þó full sem fyrr og stemmningin góð. Njarðvíkingar fjölmenntu á pallana og stuðið var mikið.

„Rifjuðum upp árið sem við urðum Íslandsmeistarar.“

Lárus Jónsson þjálfari Þórs sagði í viðtali fyrir leik að vikan hefði verið nýtt í að undirbúa leikmenn fyrir andlega baráttu. Hann sagði að hans menn væru vissulega ögn beygðir eftir leikinn á móti Ármanni en þeir væru alls ekki búnir að gefast upp. Eftir leik var hljóðið í Lárusi gott.

Aðspurður sagði hann að það hefði sést strax í upphafi að meira væri undir hjá Þórsurum.

„Við rifjuðum það upp fyrir leik að árið sem við urðum Íslandsmeistarar þá mættum við Njarðvík í síðustu umferð og þeir þurftu að vinna okkur til að halda sér uppi og gerðu það. Við lögðum okkur meira fram og vorum ákefðir í öllu sem við gerðum.“

Hann sagði að honum Þórsarar hefðu verið að keppa en Njarðvíkingar að spila og það í raun verið munurinn á liðunum. Lárus var ánægður með varnarleikinn og fannst sveitin hans hafa svarað kallinu. Aðspurður út í næstu daga og lokaumferðina sagði Lárus að hans menn þyrftu að undirbúa sig vel.

„Við þurfum að vinna í síðustu umferðinni á móti Grindavík og þurfum að treysta á að Skaginn vinni Ármann. Við höfum enga stjórn á þeirra leik. Andlega reynum við að byggja ofan á það sem við erum að gera núna. Við þurfum að fá smá sjálfstraust og vonandi gaf þessi leikur okkur það“.

Lárus sagði að eftir tapið á móti Ármanni hafi þeir haldið fund og farið yfir málin. Hann sagði að Dachon Burke hafi gengist við því að hafa sætt sig við of mikið af skotum í stað þess að ráðast á hringinn. Uppleggið í kvöld átti því að vera að ráðast á hringinn.

„Eins og litlir krakkar og taka mótlætinu engan veginn“

Rúnar Ingi Erlingsson þjálfari Njarðvíkur var allt annað en sáttur í lok leiks. Hann sagðist hafa séð í stöðunni 19-11 í hvað stefndi. Aðspurður sagði hann:

„Það er auðvelt að vera einhverjir töffarar og hnykla vöðvana og vera með einhverja stæla þegar þú ert 30 stigum yfir á móti Val. Svo koma baráttuglaðir Þórsarar og berja þig í bringuna og þá erum við eins og litlir krakkar og tökum mótlætinu engan veginn“.

Rúnar sagði þetta því miður ekki vera í fyrsta skiptið í vetur. Þetta sé taktur sem hann kannist vel við.

„Ég kalla eftir því að mínir helstu hestar taki gagnrýni. Þeir voru farnir að benda fingrum í allar áttir og væla í dómurunum. Þeir voru yfir með einhverjum átta stigu og þá var eins og þetta væri allt eitthvað svo hræðilegt. Við vorum einfaldlega skelkaðir og þannig vinnum við ekki körfuboltaleiki“.

Í hita leiksins var bekkurinn hjá Njarðvík ósáttur við dómaratríóið. Rúnar var spurður út í það hvort honum fyndist hafa hallað á hans menn í kvöld.

„Ég held ég eigi samskipti við dómarana í hverjum einasta leik. Milka er búinn að spila hérna í mörg ár og er stór og sköllóttur eins og ég. Hann er þungur og býr til snertingu en menn geta haldið honum endalaust. Það er slegið í hann og hann þarf að spila í gegnum þetta. Meðan er flautað á allt hinum meginn“.

Rúnar sagðist meðvitaður um að dómgæslan hafi ekki orsakað tapið og hann sé ekki að kenni henni um það. Hann vill þó verja leikmanninn sinn.

„Ef þetta er nýja prodokolið þá þarf ég að fá fleiri gæja á æfingu til þess að berja hann. Ég þarf samt ekkert að pæla meira í því. Nú set ég fókusinn á næsta leik. Ég þarf að pæla í því hvort leikmennirnir mínir ætli að vera töffarar eða skríða inn í skelina“.

Rúnar sagði að þeir hefðu núna viku til að ráða ráðum sínum og læra af tapinu.

„Ég trúi ekki öðru en að þessir keppnismenn og íþróttamenn í klefanum geti horft á þessa vandræðalegu frammistöðu sína og mæti brjálaðir í næstu viku“.