Vilja 25 billjónir: „Það þarf peninga til að drepa vonda kalla“

Tvö hundruð milljarðar dala samsvarar rúmum 25 billjónum króna (tólf núll). Landsframleiðsla Íslands árið 2025 var tæpar fimm billjónir króna.

Washington Post hafði eftir heimildarmanni í gær að ráðuneytið hefði farið fram á meira en tvö hundruð milljarða í aukafjárveitingu vegna stríðsins.

Mjög umfangsmikill herafli tekur þátt í árásunum gegn Íran. Tvö flugmóðurskip eru á svæðinu, með fylgiskipum, og hundruð herþota og flugvéla hafa einnig verið notaðar til að varpa þúsundum sprengja og eldflauga á skotmörk í Íran.

Innan veggja Hvíta hússins eru litlar líkur taldar á því að þingið muni fást til að samþykkja þessa upphæð.

Nauðsynlegt að fylla aftur á hillurnar

Hegseth var spurður út í þessar fregnir Washington Post á blaðamannafundi í varnarmálaráðuneytinu í dag. Þá sagði hann að 200 milljarðar dala þyrftu ekki að vera lokatalan en tók fram að það þurfi „peninga til að drepa vonda kalla“.

Þingið þyrfti að sjá um að varnarmálaráðuneytið fengi nægilega aukafjárveitingu vegna þess sem þegar væri búið að gera í Íran og vegna þess sem mögulega þyrfti að gera í framtíðinni. Það þyrfti að fylla aftur í tómar hillur í vopnabúrum Bandaríkjanna og rúmlega það.

Ráðherrann hélt því fram að Trump hefði endurbyggt bandaríska herinn á sínu fyrsta kjörtímabili og það sem betur fer, vegna þeirra átaka sem standa nú yfir. Nú væri verið að blása nýju lífi í hergagnaiðnað Bandaríkjanna og sagði Hegseth að það myndi taka styttri tíma en marga grunaði að endurfylla „vopnabúr frelsisins“, eins og hann kallaði það.

Þá gagnrýndi hann Joe Biden, fyrrverandi forseta Bandaríkjanna, fyrir að senda hergögn og skotfæri til Úkraínu. Hegseth sagði að enn væri verið að takast á við þær ákvarðanir og að betra væri að nota þessi skotfæri í þágu Bandaríkjanna.

Frá því Trump tók aftur við embætti hefur hann ekki samþykkt nýjar hergagnasendingar til Úkraínu. Hann hefur þó selt ríkjum Evrópu hergögn sem hafa verið send til Úkraínu og þá sérstaklega flugskeyti fyrir loftvarnarkerfi.

Hegseth nýtti blaðamannafundinn í morgun einnig til þess að skammast út í „vanþakkláta“ bandamenn Bandaríkjanna í Evrópu, fjölmiðla og heiminn allan fyrir að þakka forsetanum ekki fyrir það sem hann væri að gera.