„Krist­rún, það er ljótt að plata“

Peningastefnunefnd Seðlabankans hefur ákveðið að hækka stýrivexti um 25 punkta og þeir fara því úr 7,25 prósentum í 7,5. Vextir höfðu fyrir það staðið í stað í 7,25 prósentunum síðan í nóvember síðastliðnum.

Gjöf sem þjóðin þurfti ekki á að halda

Vilhjálmur Birgisson, formaður Starfsgreinasambandsins, var á línunni í Bítinu á Bylgjunni í tilefni af vaxtaákvörðuninni.

„Ég held að þetta sé einhver gjöf sem íslenska þjóðin þarf ekki á að halda þessa dagana, því að nóg dynur á okkur og það er alveg ljóst að þau markmið sem við lögðum upp með í apríl 2024, að skapa hér skilyrði með því að semja til langs tíma, fjögurra ára, með hófstilltum hætti. Við ætluðum að skapa skilyrði til þess að ná niður verðbólgunni, ná niður vöxtum. En nú er staðan orðin einfaldlega þannig að þetta er algjörlega að fara í þveröfuga átt,“ segir hann.

Vextir þrátt fyrir allt hækkað

Þegar samningar náðust hafi stýrivextir verið í 9,25 prósentum og hafi því lækkað um 1,75 prósentur. Verðbólga hafi verið í 6,8 prósentum en hún er nú í 5,2.

„Vissulega hefur þetta aðeins sigið niður, en takið eftir. Hvað voru óverðtryggðir vextir hjá Landsbankanum, ríkisbankanum þegar við semjum? Þá voru þeir 10,75 prósent, grunnvextirnir, þeir standa núna í 9,75 prósentum. Eftir þessa hækkun verða þeir komnir upp í 10 prósent. Þannig að þeir hafa einungis lækkað um 0,75 prósent.“

Þá hafi verðtryggðir vextir hjá sama banka verið fjögur prósent þegar samið var en eftir hækkun dagsins fari þeir í fimm prósent. 

„Þannig að þegar þú tekur bæði óverðtryggðu og verðtryggðu vextina, þá erum við búin að horfa upp á hækkun. Samt eru stjórnvöld að koma fram í fjölmiðlum og minna fólk á að vextir hafi lækkað um tvö prósent og ég verð nú bara að segja, af því að Kristrún sagði þetta síðast í fréttum í gær, Kristrún, það er ljótt að plata. Vextir til almennings hafa verið að hækka og þá er ég fyrst og fremst að tala hér um verðtryggða vexti þar sem fólk hefur verið þvingað yfir í þá aftur og þeir hafa hækkað um eitt prósent frá því að við undirrituðum þessa samninga.“

Fundurinn hafi engu skilað

Ertu að segja að Kristrún forsætisráðherra sé að plata eða veit hún ekki betur eða hvað?

„Já, hún ætti að vita betur vegna þess að ég fór akkúrat yfir þessar tölur í Stjórnarráðinu þegar að við aðilar vinnumarkaðarins hittum þau núna í síðustu viku.“

Vilhjálmur segir að um hvíta lygi sé að ræða hjá Kristrúnu.

„Hvíta lygin er fólgin í því að hún er að horfa á hvað stýrivextirnir hafa lækkað. Hvað stýrivextirnir hafa lækkað. Þeir hafa lækkað um tvö prósent. En þú verður að horfa á vextina sem viðskiptabankarnir eru að að bjóða viðskiptavinunum upp á. Og ég var bara að benda á það að verðtryggðu vextirnir hafa núna með þessari hækkun hækkað um eitt prósent. Þeir hafa hækkað um eitt prósent, ekki lækkað um tvö prósent.“