Clark fór á kostum í fyrsta lands­leiknum

Clark er einn vinsælasti íþróttamaður Bandaríkjanna og þetta var í fyrsta sinn í næstum því níu mánuði sem fólk sá hana spila fyrir opnum tjöldum.

Clark er í bandaríska landsliðinu sem er að taka þátt í undankeppni HM og liðið mætti Senegal í fyrsta leik.

Mótspyrnan var ekki mikil því bandarísku konurnar unnu leikinn með 64 stiga mun, 110-46.

Clark kom inn af bekknum í fyrsta landsleiknum en fór heldur betur á kostum. Hún skoraði ekki aðeins sautján stig á rúmum nítján mínútum því hún gaf einnig tólf stoðsendingar á félaga sína.

Clark skaut þó aðeins fimm sinnum á körfuna en fjögur af fimm þriggja stiga körfum hennar rötuðu rétta leið.

Rhyne Howard var stigahæst með 21 stig en hún setti niður sex þriggja stiga skot í leiknum. Kahleah Copper var síðan þriðja stigahæst á eftir Clark með tíu stig.

„Ég hélt að ég yrði stressuð en ég var bara spennt,“ sagði Clark. „Ég er búin að undirbúa mig fyrir þetta í mjög langan tíma. Það er ekkert sem jafnast á við að fá að hlaupa um völlinn og hafa gaman, sérstaklega með jafn hæfileikaríkum hópi og þessum. Þetta kom nokkuð fljótt til mín, sérstaklega þegar ég náði að setja niður fyrsta þristinn,“ sagði Caitlin Clark.

Í júlí í fyrra var Clark frá keppni um óákveðinn tíma vegna nárameiðsla og síðan kom beinmar á vinstri ökkla hennar í veg fyrir að hún gæti prófað að fullu bata nárameiðslanna. Indiana Fever tók hana úr umferð í september og hún hafði því ekki spilað alvöru leik síðan.