„Fannst til­valið að vera með í þessu“

Faðir Sigurðar er frá Bandaríkjunum og Sigurður er fæddur þar í landi, því með ríkisborgararétt og bandarískt vegabréf. Hann setti sig svo sjálfur í samband við bandaríska handknattleikssambandið.

„Það var einhvern tímann fyrir löngu sem ég sendi þeim tölvupóst fyrir yngri landsliðin. Fékk ekkert svar þá en svo fyrir einhverju einu og hálfu ári fékk ég loksins tölvupóst frá þeim og þeir buðu mér með í æfingaferð til Þýskalands,“ segir Sigurður í viðtali við Stefán Árna Pálsson.

Sigurður hefur æft upp á síðkastið með bandaríska landsliðinu og ræktað þannig tengslin við föðurlandið.

„Mig langaði svolítið að tengjast þessari hlið af mér aðeins meira. Ég er mjög stoltur af þessari hlið af mér og fannst tilvalið að vera með í þessu. Upplifa þetta.“

En hvernig eru Bandaríkjamenn í handbolta?

„Þetta er svolítil blanda sko. Það eru mjög margir í þessu landsliði eins og ég, svona hálf bandarískir, og þeir spila víða um heiminn. Alveg frá Þýskalandi yfir til Noregs eða Spánar og sumir auðvitað í Bandaríkjunum. Þannig að þetta getur verið svolítil samblanda af mismunandi getustigum, en þetta er mjög skemmtilegur handbolti.“

Bandaríska landsliðið spilaði nýlega æfingaleik við TT Holstebro, liðið í dönsku úrvalsdeildinni sem Arnór Atlason þjálfar. Leikar enduðu 36-32 fyrir Holstebro eftir nokkuð jafnan leik framan af.

„Fjögurra marka munur sem mér finnst ekkert mjög mikið sko,“ segir Sigurður um styrk bandaríska landsliðsins.

Bandaríkin verða á heimavelli á Ólympíuleikunum í Los Angeles árið 2028 og þar stefnir Sigurður á að spila.

„Klárlega. Ég held að það sé draumur allra íþróttamanna að geta kallað sig Ólympíufara. Þannig að það er klárlega eitthvað sem maður er að stefna að.“

Fjallað var um bandaríska landsliðsmanninn Sigurð Jefferson í Sportpakka Sýnar í gærkvöldi. Innslagið má sjá í spilaranum að ofan.