Hagnaður tveimur milljörðum meiri en árið áður

„Ég er afar stoltur af starfsfólki og stjórnendum Orkuveitunnar sem brugðust hratt og af festu við þegar greiðslufall varð hjá okkar stærsta orkukaupanda. Þrátt fyrir krefjandi aðstæður jókst rekstrarhagnaður Orkuveitunnar um 2,4% milli ára og félagið skilaði góðri afkomu á síðasta ári. Enn er ekki útséð um heildaráhrif málsins, en við leggjum ríka áherslu á að verja fjárhagslegan styrk Orkuveitunnar þannig að félagið geti áfram staðið undir fjárfestingum og mikilvægum verkefnum í þágu samfélagsins,“ segir Sævar Freyr Þráinsson forstjóri Orkuveitunnar.

Í tilkynningu kemur fram að á milli ára hafi rekstrartekjur aukist um 2,5 prósent en rekstrargjöld eingöngu um 1,7 prósent. Fjárfestingar ársins 2025 námu samtals 33,4 milljörðum króna en voru 30,9 milljarðar 2024.

„Veltufé frá rekstrinum – og þar með fjárfestingargeta fyrirtækjanna í þágu sjálfbærrar framtíðar – jókst á milli ára,“ segir Sævar Freyr Þráinsson, forstjóri Orkuveitunnar.

Það var 30,5 milljarðar króna 2025 en 29,1 milljarður árið áður. „Ekki veitir af,“ bætir hann við, „því samkvæmt okkar fjárhagsspá munu fjárfestingar Orkuveitunnar nema 230,5 milljörðum króna til ársloka 2030.“

Í tilkynningu segir að innleiðingu snjallmæla hjá Veitum muni ljúka á þessu ári og að við fyrirtækinu blasi aukin orkuöflun fyrir hitaveitur, efld vatnsvernd og að mæta vaxandi kröfum til fráveitna.

Þar kemur einnig fram að á árinu hafi Orkuveitan, Orka náttúrunnar og Carbfix gerst aðilar að þróunar- og nýsköpunarverkefni á Grundartanga. Á meðal þess sem felst í verkefninu sé nýting glatvarma frá iðnaði þar og fyrsta binding kolefnis beint frá orkusæknum iðnaði hér á landi.