Stelpur með fötlun unnu í opnum flokki

Mótið fór fram í fyrsta sinn á Selfossi en þar hefur borðtennisdeild verið starfrækt í sex ár. Mikil aukning borðtennisdeilda víða um land kom skýrt fram á móti helgarinnar þar sem aldrei hafa fleiri félög tekið þátt.

130 keppendur tóku þátt frá 15 félögum, til að mynda frá Patreksfirði.

Leikið var um sautján Íslandsmeistaratitla – átta í einliðaleik, sex í tvíliðaleik og þrjá í tvenndarleik.

Átta borðtennisdeildir skiptu þeim nokkuð jafnt á milli sín en sérstaka athygli vakti að tvær deildir voru að vinna sína fyrstu titla á Íslandsmóti unglinga – það eru Umf. Vísir í Suðursveit – sem stofnaði borðtennisdeild fyrir um rúmu ári síðan og ÍFR (Íþróttafélag fatlaðra Reykjavík).

Á þeirra vegum kepptu Anna Karen Malmquist Bjarnadóttir (Vísir) og Agnes Lovísa Jóhannsdóttir (ÍFR), sem sigruðu U15 flokkinn í tvíliðaleik saman (tvíliðaleikur meyja, 14-15 ára).

Anna Karen og Agnes Lovísa æfa hjá afreksmanninum Hákoni Atla Bjarkasyni í ÍFR, en hann hefur vakið athygli fyrir fjölgun fatlaðra iðkenda undanfarin ár, svo eftir hefur verið tekið. Þá unnu Agnes og Anna hvor um sig silfurverðlaun í sínum aldursflokki í einliðaleik.

„Það er ekki algengt að fötluð börn keppi á Íslandsmótum ófatlaðra hérlendis og hvað þá með svo góðum árangri. Mitt mat er að hér sé um að ræða góða þjálfun, efnilega iðkendur og þá staðreynd að borðtennis er íþrótt sem hentar vel til ástundunar fólki með ólíka hreyfifærni,“ segir Auður Tinna Aðalbjarnardóttir, formaður Borðtennissambandsins og mótsstjóri helgarinnar, við Vísi.

Vænta má þess að þær stöllur keppi áfram mikið á næstunni þar sem Íslandsmót fatlaðra verður haldið í húsi ÍFR í Hátúni næsta laugardag og næstu tvær helgar eftir það ver Íslandsmót fullorðinna fram, bæði á Hvolsvelli og í húsnæði BH í íþróttahúsinu við Strandgötu í Hafnarfirði.