Sigur hjá Ými en dýrt tap hjá Blæ

Ýmir Örn Gíslason var með liði Göppingen sem heimsótti Burgdorf. Gestirnir voru umtalsvert sterkari aðilinn í leiknum og sigur Göppingen aldrei í mikilli hættu.

Ýmir Örn skoraði eitt marka Göppingen í 28-22 sigri. Eftir hann er Göppingen með 18 stig í ellefta sæti deildarinnar, fjórum stigum frá Burgdorf sem er í níunda sæti.

Blær Hinriksson skoraði fjögur og lagði upp þrjú í 35-28 tapi Leipzig á heimavelli fyrir Bergischer.

Tapið kemur sér sérlega illa í fallbaráttunni. Bergischer er eftir sigur dagsins með tólf stig í 16. sæti, neðsta örugga sætinu. Leipzig er í 17. sæti með átta stig, jafnt botnliði Wetzlar að stigum.