Kviku­toppar fóru fýlu­ferð í Lands­rétt og borga tugi milljóna

Landsréttur kvað upp dóm þess efnis upp úr klukkan 15 og staðfesti með honum dóm Héraðsdóms Reykjavíkur, sem kveðinn var upp rétt fyrir jól árið 2024.

Umræddir stjórnendur voru háttsettir innan bankans, en hafa allir, utan tveggja, horfið til annarra starfa á síðustu árum. Umræddir stjórnendur eru eftirfarandi:

• Ásgeir Helgi Reykfjörð Gylfason, þá framkvæmdastjóri fyrirtækjasviðs og nú forstjóri Skeljar,
• Sigurður Hannesson stjórnarformaður Kviku og framkvæmdastjóri SI,
• Magnús Bjarnason þá framkvæmdastjóri fyrirtækjaráðgjafar, nú eigandi MAR ráðgjafar,
• Magnús Ingi Einarsson þá framkvæmdastjóri bankasviðs, nú fjármálstjóri Skeljar,
• Sigurður Atli Jónsson, þá fyrrverandi bankastjóri Kviku, nú forstjóri Arctic Green Energy,
• Bjarni Eyvinds Þrastarson, enn framkvæmdastjóri fjárfestingabanka Kviku.

Bankastjórinn hagnaðist um 95 milljónir

Hagnaður flestra af sölu réttindanna nam um 70 milljónum króna. Um var að ræða áskriftarréttindi á árunum 2014 til 2018. Réttindin voru leyst út í gegnum einkahlutafélög stjórnenda árið 2016 með söluhagnaði upp á tæpar 30 milljónir króna og árið 2017 með hagnaði upp á tæpar 40 milljórnir króna. Hagnaður Sigurðar Atla bankastjóra, sem leysti áskriftarréttindi tvívegis til sín árið 2018 nam hins vegar samtals tæpum 95 milljónum króna.

Þá var bankinn sjálfur krafinn um rúmlega 80 milljónir í leiðréttan fjársýsluskatt og tryggingagjald vegna tekjuáranna 2017, 2018 og 2019, þar sem réttilega hefði átt að telja sölu réttindanna til launagreiðslna.

Allt að 42 milljónum króna meira í skatt

Ágreiningur málsins snerist um hvort að ávinningur af áskriftarréttindunum skyldi teljast til tekna stjórnenda, og þar með skattlagðar eftir reglum um tekjuskatt, nokkuð sem þeir vildu ekki una.

Í dómi héraðsdóms var vísað til þess að reglur um tekjur og kauprétti væru víðtækar og tækju til nýbreytni í starfstengdum greiðslum, svo sem þeim sem deilt væri um í málinu. Við ákvörðun um hvort tekjuskattsregla ætti við þyrfti að meta heildstætt hvort áhrif starfssambands stjórnenda og Kviku leiddu til þess að þeir öðluðust þessi réttindi. Áframhaldandi störf hjá bankanum væri „viðbótarröksemd“ við það að réttindi féllu undir reglur um kauprétti, en ekki skilyrði.

Umrædd áskriftarréttindi hefðu eingöngu staðið örfáum einstaklingum úr hópi stjórnenda til boða vegna þess að þeir hafi verið starfsmenn Kviku banka hf. Það að greitt hafi verið endurgjald fyrir þau réttindi breytti ekki þeirri niðurstöðu að um væri að ræða tekjur samkvæmt valrétti.

Því stóð endurákvörðun Ríkisskattstjóra á skattstofnum stjórnendanna, með þeim afleiðingum að þeir greiddu flestir 32 milljónir króna til viðbótar í skatt en Sigurður Atli 42 milljónir króna.