Íslandsmeistarinn gekk út á miðju móti og tekur sér pásu

Athygli vakti um helgina þegar fimmfaldi Íslandsmeistarinn Matthías labbaði út í miðjum leik í Flórídana-deildinni.

Hann hafði með herkjum unnið fyrstu viðureign sína en var lentur 2-0 undir í annarri viðureigninni, þegar hann ákvað að leggja pílurnar frá sér og snúa ekki aftur.

„Það er svolítið síðan gleðin fór úr þessu,“ sagði Matthías í samtali við Vísi.

„Ég hefði svo sem ekkert átt að mæta í þetta mót [um helgina]. Ég var að keppa en ákvað bara í miðjum leik að þetta væri komið gott. Ég lagði pílurnar frá mér og labbaði í burtu.

Ég var að spila við vinnufélaga minn og hann sagði fyrir leik: „Góða skemmtun.“ En svo bara byrjum við að spila og þá fatta ég að ég hef ekkert gaman af þessu lengur. Og ef þetta er ekki gaman, af hverju að vera að þessu?“ bætti Matthías við.

Betra að stíga til hliðar en að vera ekki hundrað prósent

Hann segist hafa fundið svipaða tilfinningu þegar hann hætti fótbolta en Matthías var á sínum tíma leikmaður Þórs og Grindavíkur í efstu og næstefstu deild.

„Maður hætti að geta gefið sig hundrað prósent í þetta og þá ákvað ég bara að þetta væri komið gott. Það er svipað núna, gleðin er bara dottin úr þessu. Þá er eins gott bara að stíga til hliðar, fókusa á eitthvað annað, og svo veit maður aldrei hvað gerist í framtíðinni. Kannski rífur maður fram pílurnar einhvern tímann seinna en eins og staðan er núna þá þarf ég bara að taka smá pásu.“

Matthías hefur gefið sig allan í pílukastið síðan fótboltaferlinum lauk. Hann hefur orðið Íslandsmeistari fimm sinnum, æft alla daga og keppt flestar helgar. Auk þess hefur hann verið í ýmsum störfum tengdu pílukasti. Til dæmis sinnt þjálfun, stjórnarstörfum og útsendingum á pílumótum.

Gæti tekið Guðmund Stephensen á þetta

Nú ætlar hann að einbeita sér að öðru og þá aðallega að koma líkamanum í liðlegt stand eftir að hafa lent í brjósklosi síðasta haust.

Matthías mun þó áfram vera eitthvað í kringum pílukastið en ekki sem keppandi.

„Ég hjálpa eitthvað aðeins til með tæknilegu hliðina. Við erum að streyma frá viðburðum og ég er enn þá aðeins inni í því. Svo eru félagarnir enn þá félagar mínir og verða það áfram.“

Þá útilokar hann ekki endurkomu síðar meir, enda aðeins 39 ára gamall.

„Menn toppa í pílunni milli svona 45-55 ára. Þannig að ég gæti tekið Gumma Steph [Guðmund Eggert Stephensen] á þetta. Tek pásu í tíu ár, kem síðan aftur og verð langbestur,“ sagði Matthías léttur í bragði að lokum.