Hvað er vitað um manninn sem var skotinn við Mar-a Lago?

Hann hét Austin Tucker Martin og var frá bænum Cameron í Norður Karólínuríki.

Líkt og greint var frá í dag var Martin skotinn til bana af öryggissveit Bandaríkjaforseta, Secret Service. Það gerðist innan við norðurinngang Mar-a-Lago í Flórídaríki. Martin mun hafa haldið á haglabyssu og eldsneytisbrúsa. Öryggisverðir hafi beðið hann um að leggja báða hlutina frá sér, en hann einungis sleppt brúsanum. Hann hafi svo verið skotinn eftir að hann lyfti byssu sinni upp og mundaði hana líkt og hann ætlaði að skjóta.

Sjá nánar: Maður skotinn til bana við Mar-a-Lago

Lögreglan getur ekki séð í sínum gögnum að Martin hafi áður komist í kast við lögin. Ekki liggur fyrir hvernig Martin komst yfir haglabyssuna sem hann var með.

Trump var ekki í Mar-a-Lago þegar þetta átti sér stað.

„Virkilega ólíkt honum“

Martin er talinn hafa ekið frá Norður Karólínu til Flórída um síðastliðið laugardagseftirmiðdegi. Fjölskyldumeðlimir hans, þar á meðal móðir hans, höfðu um helgina birt færslur á Facebook þess efnis að hann væri týndur.

Í morgun, nokkru eftir að Martin var skotinn til bana, birti móðir hans færslu þar sem hún bað fólk um að hjálpa sér að „finna drenginn sinn.“ Þá benti hún á að líklega væri hann akandi um á silfruðum Volkswagen Tiguan, af árgerðinni 2013. Slíkur bíll fannst ekki langt frá vettvangi.

Fjölmiðlar vestanhafs benda jafnframt á færslu sem talin er koma frá frænku Martins, þar sem fullyrt hafi verið að „þetta væri virkilega ólíkt honum“.

Martin útskrifaðist úr menntaskóla, Union Pines High School, árið 2023. Hann var skráður á kjörskrá, en þar var ótilgreind hvaða flokk hann styddi.

Braeden Fields, frændi hans, sagði við AP-fréttastofuna að Martin kæmi úr fjölskyldu mikilla Trump-stuðningsmanna. Sá sagði jafnframt að Martin hafi unnið á golfvelli og sent hluta af launagreiðslum sínum til góðgerðarmála.

Síðasta sumar stofnaði hann fyrirtækið Fresh Sky Illustrations sem, líkt og áður segir, sérhæfir sig í handteiknuðum listaverkum af golfvöllum. 

Hann mun hafa birt slíkar myndir reglulega á Facebook, síðast á fimmtudag.