Nýkrýndir bikar­meistarar urðu undir á Meistara­völlum

Jafnræði var með liðunum í fyrsta leikhluta sem lauk með því að KR var einu stigi yfir 25-24. Gestirnir frá Keflavík mættu hins vegar sterkari til leiks í annan leikhluta og unnu hann með ellefu stigum og voru tíu stigum yfir í hálfleik, 41-51. 

Heimakonur voru hins vegar ekki á því að leggja árar í bát og mættu einbeittari til leiks í seinni hálfleik, unnu fljótt upp forystu Keflavíkur og tóku yfirhöndina í leiknum.

Svo fór að KR vann að lokum átján stiga sigur, 97-79 og kemur sér þar með upp að hlið toppliðs Hauka sem hafði betur gegn Stjörnunni fyrr í kvöld. Bæði lið eru með tuttugu og fjögur stig að loknum sautján umferðum. 

Molly Kaiser fór mikinn í stigaskorun í liði KR í kvöld. Hún setti niður 34 stig. Eve Brasils var svo einnig öflug með 23 stig en einnig tólf fráköst. Í liði Keflavíkur var það Sara Rún Hinriksdóttir sem var atkvæðamest með átján stig.