Flutti til Reykja­víkur í dag

Í samtali við fréttastofu segir Ari að uppstillingarnefnd Miðflokksins hafi leitað til sín og honum þótt það spennandi að fá tækifæri til að leiða listann. 

„Ég hef verið í Sjálfstæðisflokknum en finnst ég fá mestan hljómgrunn með mínar áherslur og markmið innan Miðflokksins. Árum saman hafa borgarbúar þráð breytingar, hvort sem það er í breyttum samgöngum eða leikskólakerfi sem virkar. Bættum árangri í grunnskólum eða ráðdeild í rekstri borgarinnar. Flokkar hafa boðið fram og boðað slíkt, en síðan farið á bak orða sinna þegar þarf að mynda meirihluta. Þannig hefur þróunin verið og það er andlýðræðislegt,“ segir Ari.

Hann vilji opna tækifæri til raunverulegra breytinga í rekstri Reykjavíkurborgar. Hann hafi ýmiss konar reynslu sem geti nýst honum í starfi. 

Erfiður tími fyrir fjölskylduna

Ari hætti sem framkvæmdastjóri Ísey útflutnings eftir að Vítalía Lazareva sakaði hann um kynferðisofbeldi. Rannsókn á málinu var felld niður sumarið 2023.

„Ég hef sagt að ég vilji skilja það mál eftir í fortíðinni. Ég var borinn röngum sökum. Þær staðhæfingar stóðust ekki þegar nánar var að gáð. Ég þurfti að kæra til yfirvalda til að koma málinu í þann farveg. Þetta tók langan tíma og hann var erfiður fyrir mig og mína fjölskyldu. Það eru þrjú ár síðan lokaniðurstaða lá fyrir og ég tel mig geta skilið það mál eftir í fortíðinni. Það hafi fyrir löngu verið upplýst og meira en fullrætt,“ segir Ari. 

Flutti í dag

Hann er með skráð lögheimili í Portúgal, þar sem hann hefur dvalið lengi síðustu mánuði. Þá hefur hann dvalið í Garðabæ þegar hann er á landinu.

„Ég er búinn að flytja til Reykjavíkur. Það er alveg rétt að þó að ég sé fæddur og uppalinn í Reykjavík, og hafi langstærstan hluta ævi minnar búið þar og alltaf starfað þar, hafi ég búið utan borgarmarkanna síðustu árin. Mest í Garðabæ en aðeins í Portúgal síðasta rúma árið. Ég er aðeins að flækja þetta, ég er sammála því. Þetta er stór ákvörðun og hún felur í sér að ég flytji til Reykjavíkur og ég mun búa hér. Ég hlakka til þess,“ segir Ari.

Hann hafi komið til landsins á fimmtudaginn og í morgun hafi hann gengið formlega frá flutningi til Reykjavíkur. 

Sonurinn einnig í framboði

Páll Edwald, sonur Ara, mun einnig skipa sæti á lista flokksins í borgarstjórnarkosningunum. Ari segir framboð þeirra beggja í aðskildum farvegi. 

„Hann hefur sinn metnað og hefur tekið þátt í starfi Miðflokksins. Hann sóttist eftir sæti og hlýtur náð fyrir augum nefndarinnar sem hefur unnið að því að stilla þessu upp,“ segir Ari.