Birgir Ómar Haralds­son er látinn

Greint er frá andlátinu í Morgunblaðinu í morgun. Birgir Ómar fæddist í Reykjavík 24. janúar 1955, sonur Ingu Ólafar Arngrímsdóttur og Haraldar Snæland Sigurðssonar.

Birgir Ómar lauk stúdentsprófi frá Tækniskólanum árið 1974 og starfaði svo hjá skipatæknideild Eimskips, þar sem hann var sjómaður á skipum félagsins. Hann stundaði svo nám við skipaverkfræði við Háskólann í Strathclyde í Skotlandi og útskrifaðist þaðan árið 1981.Birgir Ómar lauk svo meistaranámi í viðskipta- og flutningafræði frá City University Business School í London árið 1987 og síðar námi í verðbréfamiðlun og fasteignamiðlun.

Eftir nám hafði Birgir Ómar eftirlit með skipaviðhaldi og umsjón með tækjum í landi hjá Hafskip og gerðist síðar rekstrarstjóri Jökla og tók þar við stöðu framkvæmdastjóra árið 1990.

Birgir Ómar tók við stöðu framkvæmdastjóra Norðurflugs árið 2008 og starfaði hann þar meðal annars með Hrafnhildi Jóakimsdóttur, eiginkonu sinni.

Í æviágripum kemur fram að hann hafi kvænst Guðbjörgu Eggertsdóttur árið 1975 og áttu þau synina Eggert Odd og Harald Inga og dótturina Lindu Rós. Birgir Ómar giftist svo Hrafnhildi árið 1995, sem átti dótturina Katrínu Ellu sem Birgir leit ávallt á sem dóttur sína. Barnabörn Birgis Ómars eru ellefu.