Páll Edwald vill sæti á lista Mið­flokksins

Páll starfar sem yfirlögfræðingur hjá byggingarfélaginu Reir Verk og hefur reynslu í veitingabransanum, við lögmannsstofur og víðar.

Hann greinir frá ákvörðun sinni  í tilkynningu en þar segist hann hafa séð af eigin raun hvernig sífellt stærri gjá hefur myndast milli skipulags borgarinnar og raunverulegra þarfa borgarbúa.

„Verktakar eru neyddir til þess að haga stærðum íbúða innan þröngs ramma sem borgin setur, án tillits til raunverulegrar eftirspurnar neytenda. Jafnframt hefur borgin beitt sér gegn byggingu bílakjallara í nýbyggingum, sem þó hafa engin áhrif á ásýnd eða umhverfi borgarinnar. Og virðist sú þvermóðska einungis vera til að tryggja að íbúar hafi ekki aðgang að bílastæðum við heimili sín,“ segir Páll.

Pólitíska hugmyndafræði segir hann látna ráða för í stað vilja borgarbúa. Íþyngjandi reglugerð í húsnæðismálum og ósparnýtni borgarstjórnar eru meðal hugðarefna sem hann kemur inn á í tilkynningu sinni. Hann kveðst vilja leggja áherslu á kaupleiguúrræði og aðrar leiðir sem hann telur að raunhæft hjálpi fólki að eignast íbúðir sínar.

„Reykjavíkurborg ber auðvitað ábyrgð á mun fleiri málum en húsnæðismálum einum, þótt ég sé aðallega að taka þau fyrir hér, þar sem þau brenna svo mjög á minni kynslóð. Borgin á að sinna grunnstoðum sínum af festu og fagmennsku, halda aga í rekstri, forgangsraða verkefnum skynsamlega og sýna virðingu fyrir almannafé. Hvort sem um ræðir skólamál, velferðarþjónustu, innviði eða skipulagsmál, eiga ákvarðanir að byggja á raunverulegum þörfum borgarbúa. Það á ekki að vera flókið að halda götum borgarinnar hreinum í stað þess að tilkynna bara um svifryksmengun og gera ekkert í því. Þetta snýst einfaldlega um að láta grunnþjónustu virka en ekki um hugmyndafræði eða sýndarmennsku,“ segir hann.

Greint var frá því fyrr í dag að fregna væri að vænta frá Miðflokknum í borginni eftir helgi. Enn á eftir að koma í ljós hver vermir efsta sæti lista Miðflokksins en það segir Björn Ingi Hrafnsson aðstoðarmaður formanns að veðrði tilkynnt að helginni lokinni. Hann hefur verið kjördæmafélagi flokksins í Reykjavík innan handar við val á lista og uppstillingu hans í Reykjavík.