Vilja banna krökkum að skalla boltann í fót­bolta

Samtök breskra knattspyrnumanna munu í dag tilkynna um fyrstu yfirgripsmiklu verklagsreglurnar til að koma í veg fyrir heilahrörnunarsjúkdóminn CTE. Þar með er aukin áhersla lögð á að koma í veg fyrir heilahristing og þann skaða sem getur hlotist af minna kröftugum höggum við að skalla fótbolta.

Ekki skalla boltann oftar en tíu sinnum í viku

Í leiðbeiningum frá Samtökum atvinnuknattspyrnumanna (PFA), sem eru fulltrúar núverandi og fyrrverandi leikmanna í ensku úrvalsdeildinni, ensku ofurdeild kvenna og ensku deildakeppninni, er mælt með því að atvinnumenn skalli boltann ekki oftar en tíu sinnum í viku, þar með talið á æfingum.

Börn yngri en tólf ára ættu alls ekki að skalla boltann, að sögn PFA, en þetta er hluti af verklagsreglum til að koma í veg fyrir langvinnan áverkaheilasjúkdóm (CTE) og er ætlað að fækka höfuðhöggum yfir ævi leikmanns.

Það er hægt að koma í veg fyrir CTE

„Það er hægt að koma í veg fyrir CTE. Punktur,“ sagði dr. Adam White, forstöðumaður heilaheilbrigðis hjá PFA, á mánudag á fyrstu alþjóðlegu CTE-ráðstefnunni sem haldin var í San Francisco í kringum Super Bowl-leikinn sem fer fram á sunnudag.

„Meginreglurnar um færri skalla, minni kraft og sjaldnar og seinna á ævinni skipta máli,“ sagði White við The Associated Press. „Þetta gæti átt við um hvaða íþrótt sem er og er besta von okkar til að koma í veg fyrir að núverandi og framtíðar leikmenn hljóti sömu örlög og fyrri kynslóðir.“

3,5 sinnum meiri hætta á að fá heilabilun

Meðal nýlegra áhyggjuefna eru regluleg höfuðhögg sem varnarmenn í amerískum fótbolta verða fyrir og þau sem knattspyrnumenn fá við að skalla boltann. Rannsóknir sem fjármagnaðar voru af samtökunum og enska knattspyrnusambandinu sýndu að skoskir atvinnumenn eru í 3,5 sinnum meiri hættu á að fá heilabilun en almenningur; rannsóknir á heilum breskra knattspyrnumanna sýndu að meirihluti þeirra var með CTE, þar á meðal Jeff Astle, Gordon McQueen og Chris Nicholl.

„Með því sem við vitum í dag um sjúkdóminn væri það vanræksla gagnvart leikmönnum okkar að gera ekkert,“ sagði White í yfirlýsingu. 

Vísindin og lausnirnar skýrar

„Vísindin og lausnirnar eru skýrar, það þarf bara vilja frá íþróttasamtökum til að setja langtímaheilsu íþróttamanna í forgang og ég er ánægður með að okkur hafi tekist það í Englandi. Ég hvet allar íþróttir til að leggja jafn mikið, ef ekki meira, kapp á verklagsreglur til að koma í veg fyrir CTE og þær hafa gert með verklagsreglur um heilahristing,“ sagði White.