Efins um Pargo-skiptin: „Held að þetta sé ekki rétt hjá þeim“

Greint var frá þessum breytingum í gær. Pargo lék með Grindavík seinni hluta síðasta tímabils. Þá var hann með 25,7 stig og 7,3 stoðsendingar að meðaltali í deildarkeppninni en 16,4 stig og 7,4 stoðsendingar að meðaltali í leik í úrslitakeppninni.

„Ég held að þetta sé ekki rétt hjá þeim. Hann er ári eldri en hann var í fyrra en töluvert léttari segja menn en ég á eftir að sjá það. Svo á hann eftir að slípast með hinum. Hann verður örugglega góður en ég held að þeir vinni ekki titilinn bara út af honum,“ sagði Magnús Þór Gunnarsson í Bónus Körfuboltakvöldi í gær.

Hlynur Bæringsson spilaði gegn Pargo á síðasta tímabili, meðal annars í eftirminnilegu einvígi Stjörnunnar og Grindavíkur í undanúrslitum.

„Hann er ógeðslega góður í körfu. Þú sérð það á honum, þegar þú spilar við hann, að hann er skör fyrir ofan þessa deild, maður sá að hann hafði verið það einhvern tímann. En eins og Maggi segir er hann fertugur og menn geta fallið helvíti hratt á þessum aldri. Þetta er áhætta og það er örugglega ekki algengt að lið sem er þetta örugglega í efsta sætinu skipti um leikmann. Maður hefði haldið að það lið væri bara á toppnum og liði vel. Þetta er mjög sérstakt. Það er smá panikk í þessu,“ sagði Hlynur.

„Pargo er nauthraustur sem Shabazz er ekki. Hann getur gefið þeim meiri sveigjanleika í vörninni þótt hann sé orðinn þetta gamall. Það er einhver vinkill sem þeir eru mögulega að skoða því Shabazz var veikleiki í vörn og einhæfari að einhverju leyti. En þetta er samt áhætta út af aldrinum en þeir eru örugglega með mjög góðar heimildir fyrir því að hann sé í toppstandi.“

Miklu betri en Shabazz

Hlynur segir samt að þessi skipti Grindvíkinga gætu heppnast.

„Þótt ég sé mjög efins með þetta er Jeremy Pargo - ef hann hefur náð að sigra föður tíma og er ekki orðinn eldri en í fyrra, öfugt við okkur hina - töluvert betri leikmaður en Shabazz. Miklu betri sendingamaður, getur klárað betur upp við körfuna og betri varnarmaður og miklu sterkari,“ sagði Hlynur.

„Ég skil þetta að einhverju leyti. Það er bara þessi aldur,“ sagði Hlynur en Pargo er fæddur 1986. Hann lék um tíma í NBA-deildinni í Bandaríkjunum.

Grindavík er með sex stiga forskot á toppi Bónus deildarinnar. Liðið hefur unnið fjórtán af sextán leikjum sínum á tímabilinu.

Umræðuna úr Bónus Körfuboltakvöldi má sjá í spilaranum hér fyrir ofan.