Sæ­var um Kefla­vík: Eins og allir vilji ekki fá bruna­sár eða mar­bletti

„Keflavíkurliðið í þessum leik var ekkert æðislega gott, Sævar. Við vorum að sjá Remy Martin í fyrsta sinn í deildinni. Hann var búinn að spila einn leik með Keflavík í bikarnum. Hvað sástu frá honum,“ spurði Stefán Árni Pálsson Keflvíkinginn Sævar Sævarsson.

„Ég sá bara leikmann sem er ekki í leikformi og að því er virðist vera meiddur. Ég hef bara miklar áhyggjur af því vegna þess að Keflavík þarf bara virkilega á því að halda að þeir séu með góðan Bandaríkjamann. Þeir eru að velja sóknarleikinn á kostnað varnarleiksins með því að fá hann í staðinn fyrir þann sem var fyrir,“ sagði Sævar.

Skil vel að sú ákvörðun hafi verið tekin

„Ég skil vel að sú ákvörðun hafi verið tekin að finna annars konar leikmann. Varnarleikurinn og hollingin á þessu liði. Það er eins og það séu allir þarna inni á vellinum sem vilji helst ekki fá brunasár, vilji helst ekki fá marbletti. Það má alls ekki koma við þá með olnbogum eða með því að slá í hendurnar á þeim. Þeir eru sveiflandi höndum og kvartandi,“ sagði Sævar hneykslaður.

„Það fara allir í gegnum miðjuna hjá þeim. Það getur enginn leikmaður haldið manninum sínum fyrir framan sig. Svo finnst mér þetta bara svona uppgjöf. Þú sérð þetta ekki hjá liðunum sem eru að gera sig gildandi í toppbaráttunni. Við erum að tala um Tindastól, svo erum við að tala um Stjörnuna, Val, Grindavík og svo KR áðan. Þú sérð Keflavík aldrei berjast eins og þessi lið,“ sagði Sævar.

Ekki út af því að leikmennirnir séu ekki nógu góðir

„Það er ekki út af því að leikmennirnir séu ekki nógu góðir eða að þjálfararnir séu ekki nógu góðir. Það þarf bara að mynda einhverja stemningu. Leikmenn geta alveg spilað vörn en það er bara eins og þeir nenni því ekki,“ sagði Sævar.

Benedikt Guðmundsson tjáði sig einnig um Keflavíkurliðið og sagði frá því að hann hafi verið skotinn niður þegar hann varaði við mögulegum vandamálum hjá liðinu. Sævar er ekki bjartsýnn á framhaldið.

Ég ætla ekki að segja fallbyssufóður

„Þeir sem voru að tala um Keflavík sem gott varnarlið voru að gera það þegar Jordan [Williams], sem meiðist svo, var að spila með. Um leið og hann fór þá sá maður veikleikamerkin á varnarleiknum,“ sagði Sævar sem segir að enginn í Keflavíkurliðinu sé að verja hringinn.

„Núna þegar þeir losa langbesta varnarmanninn sinn og taka sennilega þann leikmann sem hefur síst verið þekktur fyrir að spila vörn. Þá er við því búist að það þurfi einhvers staðar að fylla upp í götin. Ef það verður ekki tekin ákvörðun um það þá er Keflavík farið að vera bara svona, ég ætla ekki að segja fallbyssufóður, en þá er eins gott að þeir skori yfir 120 stig í leik,“ sagði Sævar.

Það má horfa á alla umfjöllunina hér fyrir ofan.