Ítalir lögðu hald á skip frá Rúss­landi

Skipinu var siglt í höfn í Brindisi á Ítalíu en því hafði verið siglt frá Svartahafi, nánar tiltekið frá Novorossiysk í Rússlandi. Skipinu mun hafa verið siglt undir fána Tuvalo, þó skipið hafi ekki verið skráð þar, og skipstjóri þess er sakaður um að hafa falsað staðsetningargögn til að reyna að komast hjá refsiaðgerðum.

Í frétt ítalska miðilsins La Repubblica segir að innflytjandi málmanna, eigandi skipsins og áhafnarmeðlimir hafi stöðu sakborninga í rannsókn yfirvalda. Við skoðun í Brindisi hafi falsanir varðandi uppruna farmsins og ferðir skipsins komið í ljós.

Greining hafi leitt í ljós að skipið hafi verið í höfn í Rússlandi um miðjan nóvember og tekið þar á móti farminum sem búið er að leggja hald á. Ekki hefur verið gefið upp hvað skipið heitir.

Nota „Skuggaflota“ til að komast hjá þvingunum

Líklegt er að skipið tilheyri svokölluðum „Skuggaflota Rússlands“ sem er notaður af Rússum, Írönum og öðrum til að komast hjá refsiaðgerðum og viðskiptaþvingunum.

Floti þessi er skipaður hundruðum skipa sem eru í flestum tilfellum gömul og í slæmu ástandi. Þeim er reglulega siglt án þess að þau sendi út staðsetningarupplýsingar eða sendar eru út falskar upplýsingar um staðsetningu þeirra.

Sérfræðingar hafa áætlað að skuggaflotinn hafi í fyrra flutt um 3,7 milljarða tunna af olíu, sem samsvarar um sex til sjö prósentum af heildarmarkaði ársins.

Sjá einnig: Svona virkar „skuggaflotinn“

Bandaríkjamenn hafa á undanförnum vikum lagt hald á að minnsta kosti sex skip sem talin eru hafa tilheyrt Skuggaflotanum en þær aðgerðir tengdust allar herkví Bandaríkjanna á Venesúela. Evrópumenn hafa hingað til ekki stöðvað þessi skip í miklum mæli eða lagt hald á þau.

Undanfarið hefur skráningu margra skipanna verið breytt og þau skráð í Rússlandi, að virðist með því markmiði að reyna að koma í veg fyrir að þau verði stöðvuð.