Ungt barn með mis­linga á Land­spítalanum

Þetta kemur fram í tilkynningu frá Landlæknisembættinu. Þar segir að sérstaklega hafi verið haft samband við þau flugfélög sem fluttu barnið þann 5. janúar og verða farþegar upplýstir um smithættu.

„Mislingar eru bráðsmitandi skæður veirusjúkdómur sem smitar frá öndunarvegi. Einkenni geta komið fram hjá smituðum 1−3 vikum eftir smit. Þau sem hafa verið bólusett fyrir mislingum eða fengið mislinga áður smitast mjög ólíklega en ef það gerist eru einkenni oftast væg. Óbólusettir eru hins vegar í áhættu fyrir smiti og veikindum.“

Eru þeir sem haft verður samband við vegna hugsanlegrar útsetningar og fá einkenni líkt og hita, kvefeinkenni, augnroða og/eða útbrot á næstu tveimur til þremur vikum, sérstaklega ef þeir hafa ekki verið bólusettir fyrir mislingum eða ekki fengið mislinga, eindregið hvattir til að hafa samband við lækni eða heilsugæslu símleiðis (1700 á höfuðborgarsvæði) eða gegnum netspjall Heilsuveru.

„Ef þú telur þig vera óbólusettan og vilt láta bólusetja þig við mislingum, hafðu samband við lækni/heilsugæslu símleiðis (1700 á höfuðborgarsvæði) eða gegnum netspjall Heilsuveru. Athugið að bólusetning vegna útsetningar þarf að eiga sér stað ekki seinna en 8. janúar tengt fluginu og 9. janúar tengt Barnaspítala.“

Frekari upplýsingar um mislinga má finna á vef embættis landlæknis.