Ingi­björg og Ei­ríkur taka em­bætti dómara við Lands­rétt

Þetta kemur fram í tilkynningu á vef stjórnarráðsins.

Ingibjörg er með embættispróf í lögfræði frá Háskóla Íslands og meistarapróf í mannauðsstjórnun frá Strathclyde-háskóla í Skotlandi. Hún hefur meðal annars starfað hjá sýslumanni, fjármálaráðuneytinu og sem fulltrúi ráðuneytisins hjá sendinefnd Íslands gagnvart ESB. Þá var hún áður lektor og deildarforseti við lagadeild Háskólans á Bifröst auk þess að hafa gegnt dómarastörfum við Héraðsdóm Reykjavíkur og verið varadómari við Hæstarétt.

„Þá hefur Ingibjörg setið í opinberum stjórnum og nefndum, þar á meðal sem formaður kærunefndar greiðsluaðlögunarmála, í stjórn Fjármálaeftirlitsins og í landskjörstjórn og yfirkjörstjórn Reykjavíkurkjördæmis norður. Ingibjörg sat í stjórn Dómarafélags Íslands frá 2014 til 2019, þar af sem formaður félagsins frá 2017 til 2019,“ segir meðal annars einnig um reynslu Ingibjargar í tilkynningunni.

Þorbjörg Sigríður Gunnlaugsdóttir hefur einnig sett Eirík Elís í embætti dómara við Landsrétt frá og með deginum í gær og gildir skipun hans út febrúar 2029. Eiríkur er einnig með embættispróf í lögfræði frá HÍ ásamt LL.M. gráðu frá King‘s Collage í London og hefur einnig komið víða við á sínum starfsferli.

„Að loknu embættisprófi starfaði Eiríkur Elís um hríð hjá óbyggðanefnd en hóf árið 2002 störf á lögmannastofu þar sem hann starfaði til ársins 2011, þar af sem meðeigandi frá 2004. Frá 2012 hefur hann starfað við lagadeild Háskólans í Reykjavík, fyrst sem lektor en sem dósent frá 2017, auk þess sem hann hefur sinnt lögmannsstörfum samhliða á þeim tíma. Frá mars 2019 til apríl 2024 gegndi hann starfi deildarforseta lagadeildar Háskólans í Reykjavík auk þess að sinna kennslu við aðra háskóla. Þá hefur hann tvisvar verið settur dómari við Landsrétt, samtals í um fjögurra mánaða skeið og verið varadómandi í Endurupptökudómi frá 2021,“ segir meðal annars um reynslu Eiríks, sem jafnframt hefur ritað fræðibækur og ritrýndar fræðigreinar og setið í stjórnum ýmissa félaga.