Tvinn-rafmagnsflugvél sem lækka á far­gjöldin

Verkefnið hófst fyrir sex árum en hefur farið mjög leynt og kom það flugfréttamiðlum heims í opna skjöldu þegar Evio sendi út fréttatilkynningu síðastliðinn fimmtudag, 11. desember. Þar kemur fram að þegar séu komnir samningar og viljayfirlýsingar frá tveimur stórum flugrekendum um kaup á 450 eintökum. Þeir eru þó ekki nafngreindir.

Mesta athygli vekja bakhjarlar verkefnisins. Boeing-flugvélaframleiðandinn veitir tæknilega aðstoð og Pratt & Whitney-hreyflaframleiðandinn leiðir þróun hreyfils flugvélarinnar. Samstarf Evio við þessa tvo af reyndustu tæknirisum fluggeirans þykir mikill kostur þegar kemur að því að þróa og fá vottun fyrir algerlega nýja flugvél.

Stærð flugvélarinnar miðar við að hún beri 76 farþega en jafnframt er stefnt á fraktvél og herútgáfur. Farþegarýmið verður breiðara en nú þekkist í vélum af þessari stærð, sem á að gera hana þægilegri fyrir farþega.

Flughraðinn er áætlaður um 620 kílómetrar á klukkustund og flugdrægið um 900 kílómetrar, eða 500 sjómílur, en hún er sögð geta hentað vel á 400-550 kílómetra löngum flugleggjum.

Þess má geta að flugleiðin milli Reykjavíkur og Akureyrar er um 250 kílómetrar en milli Reykjavíkur og Egilsstaða um 380 kílómetrar. Flugleiðin milli Keflavíkur og Færeyja er um 800 kílómetrar.

Bæði sætafjöldi og hraði Evio-vélarinnar er sá sami og Dash 8 Q400-vélanna, sem eru burðarásar innanlandsflugs Icelandair.

Evio 810 á að geta flogið eingöngu á rafmagni yfir stuttar vegalengdir, allt að 200 kílómetra, en nýta skilvirka brunahreyfla sem varaafl á lengri flugum. Tvinn-tæknin er sögð draga stórlega úr eldsneytisbrennslu, útblæstri og hljóðmengun, auk þess að lækka rekstrarkostnað flugfélaga.

„Við viljum gera svæðisbundið flug bæði hagkvæmara og umhverfisvænna,“ er haft eftir Michael Derman, framkvæmdastjóra Evio. „Evio 810 sameinar áreiðanleika hefðbundinna véla og kosti rafmagnsdrifs – án þess að fórna flugdrægni eða öryggi.“

Þróunar- og stjórnendateymi Evio samanstendur af miklum reynsluboltum úr fluginu. Í stjórn félagsins sitja meðal annarra Rob Dewar, fyrrum aðstoðarforstjóri hjá Airbus, sem var áður yfir þróun Bombardier CS-þotunnar, núna Airbus A220, og Frank Cappuccio, fyrrverandi framkvæmdastjóri hjá Lockheed Martin, en þar stýrði hann meðal annars þróun á herþotum.

Sjá má flugvélina og heyra lýsingar forystumanna á verkefninu í myndbandi frá Evio: