Martraðarverktaki Kópa­vogs­bæjar greiddi ekki krónu með gati

Ítalski verktakarisinn Rizzani de Eccher stofnaði samnefnt félag á Íslandi árið 2017. Félagið vakti nokkra neikvæða athygli fyrstu árin og datt svo í lukkupottinn árið 2021 þegar það varð hlutskarpast í útboði Kópavogsbæjar um byggingu nýs Kársnesskóla sem í dag heitir Barnaskóli Kársness.

Kársnesskóli hafði þá verið rifinn eftir mikið mygluvandamál og farið í útboð vegna endurreisnarinnar. 

Sex íslensk verktakafyrirtæki buðu í verkið en svo fór að Rizzani de Eccher átti besta tilboðið upp á 3,2 milljarða króna. Ístak bauð rúmum sextíu milljónum krónum hærra í verkið sem telja má líklegt að hefði verið farsælli niðurstaða fyrir Kópavogsbæ.

Kostnaðaráætlun Kópavogsbæjar hljóðaði upp á rúma 3,6 milljarða og var útboðið það stærsta sem bærinn hafði ráðist í. Til stóð að ljúka verkinu í maí 2023 en verkefnið hljóðaði upp á sameiginlegan leik- og grunnskóla upp í fjórða bekk, framkvæmd upp á rúmlega 5700 fermetra.

Bæjarstjórn Kópavogs ákvað í maí 2023 að rifta verksamningi við verktakafyrirtækið vegna ýmissa galla sem komið hefðu upp og þeirrar staðreyndar að ekki hefði verið sinnt fullnægjandi úrbótum þrátt fyrir ítrekaðar áskoranir. Í ljós hafði komið að rakaskemmdir og mygluvandræði voru þegar að gera vart við sig á byggingartíma.

Málið kom til kasta Gerðardóms sem komst að þeirri niðurstöðu að Kópavogsbær væri í fullum rétti að rifta samningnum.

Kópavogsbær gerði í framhaldinu kröfu um að verktakinn yrði tekinn til gjaldþrotaskipta og samþykkti Héraðsdómur Reykjavíkur í september að taka búið til gjaldþrotaskipta. Engar eignir fundust í búinu og var skiptum lokið í lok nóvember.

Grímur Már Þórólfsson, skiptastjóri Rizzani de Eccher, segir engan rekstur hafa verið í fyrirtækinu eftir að Kópavogsbær rifti samningnum. Stærsti kröfuhafinn sé Kópavogsbær með skaðabótakröfu upp á á annan milljarð króna og svo undirverktakar sem fengu ekki greitt frá ítalska fyrirtækinu. Ekki hafi tekist að ná í fyrirsvarsmenn fyrirtækisins og aðeins náðst samtal við lögmann ítalska móðurfélagsins.

Ásdís Kristjánsdóttir bæjarstjóri í Kópavogi segir að bærinn hafi gert samkomulag við móðurfélagið þannig að hægt sé að sækja skaðabótamál á hendur því.

„Við erum með lögfræðina þar ytra og auðvitað hér heima sem eru að vinna í þessu. Ég vænti þess að fá niðurstöðu á nýju ári,“ segir Ásdís. Bærinn ætli að sækja fullar bætur enda ljóst að hefði ekki verið farið í riftun á sínum tíma hefði kostnaðurinn orðið enn meiri en orðið var.

„Ástand hússins var slíkt að það var aldrei að fara að uppfylla þær gæðakröfur sem við gerum til grunnskóla og skólabygginga.“

Annars er það að frétta af Barnaskóla Kársness að hann tók til starfa í ágúst og er samrekinn leik- og grunnskóli fyrir 1. til 4. bekk. Í honum eru tæplega 300 börn á grunnskólaaldri og 40 börn á leikskólaaldri.