Trump fékk Friðar­verð­launin og setti verð­launa­peninginn strax um hálsinn

Trump fékk bæði bikar og verðlaunapening sem hann setti strax um hálsinn á sér. Hann var virkilega sáttur með verðlaunin.

Gianni Infantino fór yfir af hverju Trump fær þessi verðlaun. Gaman að gefa besta vini sínum verðlaunin sem hann fékk ekki hjá Nóbelnum á dögunum.

Infantino stofnaði verðlaunin án alls samráðs við aðra stjórnendur FIFA, sambandið hefur ekki svarað fyrirspurn Amnesty um valnefnd eða viðmið varðandi verðlaunin og sagði fyrr í ár að Trump hafi átt að fá friðarverðlaun Nóbels.

Bandaríkjaforseti tók við verðlaunapeningnum sínum og setti hann strax um hálsinn á sér, áður en Gianni Infantino hrósar honum með því að lesa af opinberu verðlaunaskjali FIFA og segja honum hversu frábær hann sé.

„Við viljum sjá von, við viljum sjá einingu, við viljum sjá framtíð,“ segir Gianni. „Þetta er það sem við viljum sjá frá leiðtoga og þú átt svo sannarlega skilið fyrstu friðarverðlaun FIFA. Þú getur alltaf reitt þig á stuðning minn til að hjálpa þér að koma á friði um allan heim. Þakka þér fyrir, herra forseti.“

„Þetta er einn mesti heiður sem mér hefur hlotnast um ævina. Við höfum bjargað milljónum og aftur milljónum mannslífa. Við höfum getað bundið enda á svo mörg stríð. Tölurnar fyrir heimsmeistaramótið eru langt umfram það sem við töldum mögulegt. Við ætlum að halda viðburð sem er stærri en nokkuð sem heimurinn hefur séð,“ sagði Donald Trump, forseti Bandaríkjanna.