Nína Björk og Aron selja einbýlið við Grettis­götu

Um er að ræða fallegt 243 fermetra einbýlishús á þremur hæðum steinsnar frá hringiðu mannlífsins í miðborg Reykjavíkur.

Heimili hjónanna er innréttað á afar smekklegan máta þar sem fagurfræði, listaverk, litagleði og rómantískur stíll setja sterkan svip á eignina og ljá því einstakan karakter.

Komið er inn í parketlagt anddyri með stórum fataskáp og gestasnyrtingu. Aðalhæðin er opin og björt með setustofu, rúmgóðri stofu og eldhúsi. Í setustofunni er ný kamína. Eldhúsið er með ljósgrárri innréttingu með gylltum höldum, rúmgóðri eyju og stórri gaseldavél.

Frá anddyrinu liggur dúklagður stigi upp á efri hæð. Þar er rúmgóð hjónasvíta með sér fataherbergi, barnaherbergi og baðherbergi með baðkari.

Í kjallaranum er notalegt sjónvarpsrými og svefnherbergi með parketi á gólfi og loft klætt viðarfjölum sem gefa rýminu mikinn karakter.

Eignin telur alls sex svefnherbergi og fjögur baðherbergi. Í bakgarðinum er skúr sem skráður er sem geymsla en hefur verið leigður út sem stúdíóíbúð.

Nánari upplýsingar á fasteignavef Vísis.